Lō͘ka hokim su Tē peh chio͘ⁿ

 8 : 1 Kòe bô kúi ji̍t , Iaso͘ khì ta̍k ê hiongtìn kah chngthâu soanthoân Siōngtè kok ê hó siausit . Hām I chòhóe khì ê ū cha̍pjī ê ha̍kseng ,

8 : 2 koh ū tùi hō͘ siâsîn hūsin , pēⁿthiàⁿ tîⁿsin tittio̍h itī ê kúi ê hūlú , paukoa chhengchò Boahtāilia̍p ê Málīa ( bat tùi i ê sin chiō͘ⁿ kóaⁿ chhut chhit ê siâsîn )

8 : 3 koh ū Hilu̍t ê koánke Khó͘ sat ê bó͘ Iokaná , So͘ satná , hām kúi ā ê kîthaⁿ ê hūlú , lóng theh katī ê saikhia chîⁿ hām mi̍hkiāⁿ kiongkip Chú Ia-so͘ kap I ê ha̍kseng .

8 : 4 Tng chin chē lâng chip óa lâi , mā ū tùi ta̍k ê hiongtìn lâi ê lâng beh kìⁿ Iaso͘ , I chiū ēng phíjū kā in kóng :

8 : 5 “ Ū chi̍t ê lônghu chhut khì iāchèng . iā ê sî , ū ê lak tī lō͘ piⁿ hō͘ lâng tah pháiⁿ khì , ásī khì hō͘ thiⁿténg ê poechiáu lâi tok khì .

8 : 6 Ū ê lak tī chhùi chio̍há téng , chi̍t ē chhutgê chiū ta khì , inūi khip bē tio̍h chúihun .

8 : 7 Ū ê lak tī chháu chhìà lāi , hia ê chhìá hām i chòhóe hoat khílâi , soah khì hō͘ âⁿ sí .

8 : 8 Ū ê iā tī hó ê thô͘ bah téng , tōachâng khí lâi , siusêng pah pōe .” Iaso͘ kóng liáu chia̍h ê ôe , koh tōasiaⁿ hoah : ” Ū hīⁿkhang thang thiaⁿ ê , tio̍h thiaⁿ ! ”

8 : 9 Ha̍kseng mn̄g I kóng : ” Chit ê phíjū sī siáⁿmih ìsù ? ”

8 : 10 I kóng : ” Siōngtè kok ê òpì íkeng hō͘ lín chai à , nāsī tùi kîthaⁿ ê lâng chiū ēng phíjū , hō͘ in khòaⁿ iā khòaⁿ bô , thiaⁿ iā thiaⁿ bē liáukái . ”

8 : 11 “ Chit ê phíjū ê ìsù sī ahne , chéngchí chiū sī Siōngchú ê ōe .

8 : 12 Hia ê lak tī lō͘ piⁿ ê , sī phíjū lâng ū thiaⁿtio̍h Siōngchú ê ōe , m̄ku chinkín chiū hō͘ mô͘kúi tùi i ê lāisim chhió͘ⁿkhì , bián tit i sìn lâi tittio̍h kiù .

8 : 13 Hia ê lak tī chhùi chio̍há téng ê , sī leh kóng ū lâng thiaⁿtio̍h Siōngchú ê ōe , hoaⁿhí niásiū , m̄ku bô kèsio̍k niásiū só͘í jīnsek bô chhim , tī i tú tio̍h khógiām ê sî chiū hòngkhì .

8 : 14 Hit ê lak tī chháu chhìá lāi ê , sī leh kóng ū lâng thiaⁿ liáu , hō͘ sengoa̍h tiong ê khòalū , chîⁿchâi , iànlo̍k pa̍ktiâu leh , chiū kiat bô liap thang siusêng .

8 : 15 Hit ê lak tī hó thô͘bah ê , sī chí ū lâng thiaⁿtio̍h Siōngchú ê ōe chiū ēng chinsi̍t kap siānliông ê sim lâi chhîsiú , koh kianchhî kàu lō͘ bóe . ”

8 : 16 “ Bô lâng tiám chi̍tpha teng , chôaⁿ theh mi̍hkiāⁿ kā khàm khí lâi , ásī chhāi tī bînchhn̂g kha , ittēng sī khǹg tī tengtâi téng , hō͘ li̍p chhù lāi ê lâng thang khòaⁿtio̍h .

8 : 17 Inūi bô chi̍t hāng pī amkhám ê tāichì bē lò͘hiān ; mābô chi̍t kiāⁿ pìbi̍t ê sū bē hō͘ lâng chaiiáⁿ .

8 : 18 Só͘í lín tio̍h sèjī ánchóaⁿ thiaⁿ , inūi ū ê , beh koh khah ke hō͘ i ; bô è , liân i katī lia̍hchò ū ê , mā beh kā theh tò tńg lâi . ”

8 : 19 Iaso͘ ê lāubú hām siótī lâi kàu ūi , inūi lâng chin chē , chôaⁿ bē tàng kiâⁿ kàu I ê bīnchêng .

8 : 20 Ū lâng kā I kóng : ” Lín lāubú hām siótī khiā tī gōa-bīn , beh chhōe LÍ . ”

8 : 21 Iaso͘ ìn in : ” Thiaⁿtio̍h Siōngchú ê ōe koh khì kiâⁿ ê lâng chiūsī Góa ê lāubú , Góa ê hiaⁿtī . ”

8 : 22 Kòe kúi ji̍t , Iaso͘ hām ha̍kseng chiō͘ⁿchûn , I kā in kóng : ” Lán lâi khì ô͘ ê tùibīn hōaⁿ .” In chiū khíkiâⁿ .

8 : 23 Chûn teh kiâⁿ ê sî , Iaso͘ soah khùnkhì . Thu̍tjiân kan ô͘nih tháu tōahong , chúi itti̍t phoah li̍p chûn lāi , chêngsè chin gûikip .

8 : 24 Ha̍kseng kòe lâi kiò chhéⁿ Iaso͘ kóng : ” Lāusu! Lāusu! Lán the beh bô miā à ! ” I chi̍t ē chhéⁿ lâi sūi chekpī chi̍t tīn tōa hongéng , in chiū tiām-khì , ô͘ sūi hoeho̍k pêngchēng .

8 : 25 Iaso͘ mn̄g in : ” Lín ê sìnsim tī tóūi ? ” In iáu teh kiaⁿhiâⁿ mā siō͘ⁿ lóngbô , hō͘siong mn̄g tùihong : ” I tàuté sī siáⁿmih lâng ? Liân hong kap éng iā thiaⁿ I ê ōe , koh sūnchiông I ê hoanhù . “

8 : 26 In lâi kàu Keklahsim lâng tòa ê só͘chāi , sī tī Kalīlī ê tùibīn .

8 : 27 Iaso͘ chi̍t ē chiō͘ⁿ hōaⁿ , sūi ū hit ê siâⁿgōa ê chi̍t ê hō͘ siâsîn hūsin ê lâng lâi chhōe I . Chit ê lâng tn̂gkú ílâi lóng bô chhēngsaⁿ , iā m̄ tòa jīmhô chi̍t keng chhù , kánā tòa tī bōngápo͘ .

8 : 28 I chi̍t ē khòaⁿtio̍h Iaso͘ chiū phak tī I ê bīnchêng , tōa siaⁿ hoah : ” Chìkoân Siōngchú ê kiáⁿ Iaso͘ , góa kap Lí ū siáⁿ koanhē ? Kiû Lí mài lâi hō͘ góa siūkhó͘ ! ”

8 : 29 Inūi Iaso͘ bat kiò hit ê siâsîn tùi chit ê lâng ê sinchiō͘ⁿ l-khui . Tn̂g kú ílâi hit ê siâsîn tiāⁿtiāⁿ lâi choklōng i , koh hō͘ lâng ēng thihliān kā pa̍k kha pa̍k chhiú kò͘ tiâutiâu , m̄ku mā tiāⁿtiāⁿ hō͘ chhoah tn̄g , chôaⁿ hō͘ siâsîn chhōa khì iágōa .

8 : 30 Iaso͘ mn̄g i : ” Lí kiò siáⁿmih miâ ? ” I ìn : ” Góa kiò「Kûn」” , Che sī inūi tîⁿ i ê siâsîn chin chē .

8 : 31 Hit tīn siâsîn aikiû Iaso͘ , mài bēnglēng in lo̍h khì bô té chhimkheⁿ .

8 : 32 Tī hia tú hó ū chi̍t tīn ti tī soaⁿphiâⁿ leh chhōe chia̍hmi̍h . Siâsîn chiū kiû Iaso͘ chún in ji̍p khì hia ê ti ê lāibīn . Iaso͘ chiū chún in ,

8 : 33 siâsîn chôaⁿ tùi hit ê lâng chhut khì , ji̍p khì tikûn lāi-bīn . Hia ê ti chôaⁿ án soaⁿphiâⁿ chông lo̍h khì ô͘ nih , imsí tī hia .

8 : 34 Hia ê kò͘ ti ê lâng khòaⁿtio̍h áne chiū kín cháu līkhui , pò lâng chaiiáⁿ chit hāng tāichì , in ū ê tòa siâⁿlāi , ū ê tòa kaugōa .

8 : 35 Ta̍kke lóng chhut lâi beh khì khòaⁿ sī hoatseng siáⁿmih tāichì , lâikàu Iaso͘ hia , iā khòaⁿtio̍h siâsîn íkeng līkhui ê hit ê lâng , saⁿ chhēng leh , chengsîn íkeng ho̍kgoân , chē tī Iaso͘ ê kha chêng , in soah kiaⁿtio̍h .

8 : 36 Khòaⁿkìⁿ chithāng sū ê lâng chiū chiong hō͘ siâsîn hūsin ê , ánchóaⁿ tittio̍h ho̍kgoân pò lâng chai .

8 : 37 Só͘ū tòa tī Kehlahsim ê lâng , lóng chin kiaⁿhiâⁿ putan , kiû Iaso͘ līkhui in , Iaso͘ chiū chē chûn tńg khì .

8 : 38 Hit ūi àn pī siâ-sîn hūsin tit tio̍h tháupàng ê , khúnkiû Iaso͘ hō͘ i chòhóe khì , Iaso͘ hoán tńg kiò i tńg khì , kóng :

8 : 39 ” Tńg khì lín tau , tùi in kóng Siōngchú chò tī lí ê sin chiō͘ⁿ ê sū ū lōa tōa .” I chiū tńg khì , tī siâⁿnih chi̍t sìkè soanthoân Iaso͘ chò tī i sinchiō͘ⁿ ê tōa tāichì .

8 : 40 Iaso͘ tńg lâi ê sî , ta̍kke lóng hoangêng I , inūi in lóng leh tán I .

8 : 41 Ū chi̍t ê hōetn̂g ê koánlí oân , miâ kiò Gâiló͘ , phak loh tī Iaso͘ ê khachêng , kiû Iaso͘ khì in tau .

8 : 42 Inūi i kánā seⁿ chi̍t ê châkiáⁿ , tāiiok cha̍pjī hòe , íkeng teh beh sí à . Iaso͘ chiânóng ê sî , chi̍t tōa tīn lâng mā kā khé tiâutiâu .

8 : 43 Ū chi̍t ê hūlú , i hoān tio̍h hūlú pēⁿ íkeng cha̍pjī nî , mā chiong i só͘ū ê chîⁿgîn lóng ēng lâi ipēⁿ , khiok bô pòaⁿ ê iseng ē tàng ihó i ê pēⁿchèng .

8 : 44 I kiâⁿ lâi Iaso͘ ê āupiah , bong Iaso͘ ê saⁿá ku ê chhiu , chhut hoeh ê hiānsiōng sûi sî thêngchí .

8 : 45 Siângsî Iaso͘ mā mn̄g : ” Sī siáⁿlâng bong Góa?” Lóng bô lâng sêngjīn , Pítek hām kui tīn lâng ìn : ” Lāusu! Hiah chē lâng kā Lí khé leh chòhóe kiâⁿ lah .”

8 : 46 Iaso͘ kóng : ” Tú chiah ū lâng lâi bong Góa , inūi Góa chin chhengchhó ū khùila̍t àn Góa sinchiō͘ⁿ chhut khì . ”

8 : 47 Hit ūi hūlú chaiiáⁿ bē tàng koh amkhám , chiū ngiaungiauchhoah lâi phak tī Iaso͘ ê kha chêng , tī tāike ê bīnchêng kóngbêng i bong Ia-so͘ ê goanin , hām pēⁿchèng sūi tit-tio̍h hó .

8 : 48 Iaso͘ kā I kóng : ” Chabó͘ kiáⁿ , lí ê sìnsim hō͘ lí tittio̍h hó , lí thang pêngan tńg khì .

8 : 49 iàu leh kóng ê sî , ū lâng àn hōetn̂g koánlí oân in tau lâi , kóng : ” Lí ê châ kiáⁿ sí à , m̄ bián koh lôhoân lāu-su à . ”
8 : 50 Iaso͘ thiaⁿtio̍h áne , sūi kā i kóng : ” M̄ bián kiaⁿ , sìn chiū sī ! Lí ê châkiáⁿ chiū ē hó khí lâi . ”

8 : 51 Tng Iaso͘ khì kàu in tau , tûliáu Pítek、Iokhān、Ngákok hām chabó͘ gíná ê pēbú ígōa , m̄ chún pa̍tlâng hām I li̍p khì .

8 : 52 In tāike lóng ūi tio̍h chit ê chabó͘ gíná teh aisiong thîkhàu . Iaso͘ kóng : ” Mài koh khàu à! I m̄ sī sí khì , sī khùn khì niā . ”

8 : 53 In soah thíchhiò Iaso͘ , inūi in lóng chaiiáⁿ hit ê chabó͘ gíná íkeng sí à .

8 : 54 M̄ku Iaso͘ sūi khì khan i ê chhiú , tōa siaⁿ hoah : ” Châkiáⁿ , khí lâi ! ”

8 : 55 I ê lênghûn sūi tò tńg lâi , cheksî peh khí lâi . Iaso͘ kiò lâng theh mi̍hkiāⁿ hō͘ chia̍h .

8 : 56 I ê pēbú kámkak chin sînkî , Iaso͘ kautāi in , m̄ thang chiong só͘ hoatseng ê sū kā lâng kóng .

              2019/01/31   17 : 02  2025.07.15. Siukái tī Lâmthâm