22 : 1 Tûkàⁿ chiat mā kiò chò Pôaⁿkòe chiat, teh beh kàu à.
22 : 2 Chèsi tió͘ⁿ hām kàusu kiaⁿ bînchiòng ē khí liáuloān,
só͘í teh chhōe khòaⁿ ū siáⁿmih honghoat thang hāmhâi Iaso͘.
22 : 3 Sattàn ji̍p khì hit ê kiòchò Kaliok ê Iûtāi ê sim lāi,
i sī cha̍pjī ê ha̍kseng ê chi̍t ê.
22 : 4 I chiū khì kap chèsi tió͘ⁿ hām sèngtiān ê siúūi koaⁿ
chhamsiông, beh ánchóaⁿ kā Iaso͘ kau hō͘ in.
22 : 5 In chin hoaⁿhí, mā tahèng hō͘ i kèchîⁿ.
22 : 6 I ma tôngì, chiū siòng kihōe, tī bînchiòng lóng bô
chāitiô͘ⁿ ê sî, kā Iaso͘ kāu hō͘ in.
22 : 7 Tûkàⁿ chiat kàu à, hit ji̍t tio̍h ài thâi Pôaⁿkòe chiat
ê iô͘ⁿko.
22 : 8 Iaso͘ kā Pítek、Iokhān kóng: ”Lín khì thè lán chúnpī Pôaⁿkòe chiat ê àmtǹg,
hō͘ lán thang chia̍h.”
22 : 9 In mn̄g: ”Ài goán tī tóūi chúnpī ?”
22 : 10 Iaso͘ ìn: ”Lín ji̍p siâⁿ nih, ē tú tio̍h chi̍t ê
kōaⁿ chúipân ê lâng, lín chiū tòe i ji̍p khì i khì ê hit keng chhù,
22 : 11 mn̄g hit keng chhù ê chúlâng: ”「Lāusu
mn̄g, khehthiaⁿ tī tóūi? Thang hō͘ Góa kap ha̍kseng tī hia chia̍h Pôaⁿkòe chiat
ê àmtǹg.」
22 : 12 I ē chhōa lín khí khòaⁿ lâuténg chhoân hósè ê
tōathiaⁿ. Lín chiū tī hia chúnpī .”
22 : 13 In khì ê sîchūn, só͘ hoatseng ê tāichì lóng chiàu
Iaso͘ só͘ kóng ê, in chiū chúnpī Pôaⁿkòe chiat ê àmtǹg.
22 : 14 Chia̍hpn̄g sîkan kàu, Iaso͘ kap ha̍kseng chē chòhóe
chia̍h.
22 : 15 Iaso͘ kā in kóng: ”Góa chhiatchhiat ìài tī siūhāi
chìnchêng kap lín chòhóe tī Pôaⁿkòe chiat chia̍h àmtǹg.
22 : 16 Góa kā lín kóng, Góa bē koh chài chia̍h chit khoán
àmtǹg, ti̍t kàu SiōngChú ê koktō͘ si̍thiān íchêng.”
22 : 17 Iaso͘ kā poe chiap kòe lâi, kámsiā SiōngChú liáuāu
kóng: ”Lín phâng chit ê poe, tī lín tiongkan chòhóe hunhióng.
22 : 18 Inūi Góa ū kā lín kóng, tùi taⁿ íāu, Góa bē koh lim
chit poe phôtô chiap, ti̍t kàu SiōngChú ê koktō͘ lâilîm.”
22 : 19 koh theh piáⁿ khí lâi, kámsiā liáu chiū pé khui
thoân hō͘ ha̍kseng kóng: ”Che sī Góa ê sengkhu ūi tio̍h lín hiàn ê, lín tio̍h
kiâⁿ áne lâi kìliām Góa.”
22 : 20 Àmtǹg chia̍h soah, iā siāngkhoán phâng poe khí lâi,
kóng: ” Chit ê poe sī ēng Góa ūi tio̍h lín lâu ê hoeh só͘ li̍p ê siniok.
22 : 21 M̄ku, khòaⁿ leh, hit ê beh chhutbē Góa ê lâng ê
chhiú kap Góa chòhóe tī chit tè tohténg.
22 : 22 Góa suijiân pī ūtēng tio̍h līkhui sèkan, m̄ku
chhutbē Góa ê lâng ē hāi ò͘!”
22 : 23 Ha̍kseng hō͘siong mn̄g tùihong, sī siáⁿlâng chò
chit khoán tāichì.
22 : 24 Ha̍kseng tu leh chenglūn, in tiongkan tó chi̍t ê
siōng tōa.
22 : 25 Iaso͘ kóng: ”Gōakok lâng in ū kokông chò thâu lâi
tīlí in, hia ê ū koân tīlí in ê lâng pī chhengchò Unchú.
22 : 26 m̄ku lín m̄thang áne, lín tiongkan chò láutōa ê,
tiantó tio̍h chhinchhiō͘ⁿ chò sèhàn è, chò chhōathâu ê, hoántńg chhiō͘ⁿ chò hō͘
lâng chhe ēng ê.
22 : 27 Siáⁿlâng khah tōa? Sī chē toh ê lângkheh? ásī
chheēng è? Kám m̄ sī chētoh ê lângkheh mah? M̄ku, Góa tī lín tiongkan nāchhiō͘ⁿ
hō͘ lâng chhe ēng ê.
22 : 28 Tī Góa ê chhìliān tiong, tiāⁿtiāⁿ kap Góa chòhóe ê
chiū sī lín.
22 : 29 Góa sù lín chit ê koktō͘, chhinchhiō͘ⁿ Thiⁿpē sù hō͘
Góa ê siāngkhoán,
22 : 30 thang hō͘ lín tī Góa ê koktō͘ chētoh limchia̍h, koh
chē tī Góa ê póchō lâi sìmphòaⁿ Íseklia̍t cha̍pjī ê chiphài.”
22 : 31 Chú koh kóng: ”Sebûn à! Sebûn! Khòaⁿ leh, Sattàn
iàukiû tit tio̍h koânlī, thang kā lín khǹg tī thaiá, náchhiō͘ⁿ leh thai be̍hà;
22 : 32 m̄ku Góa íkeng thè lín kîtó, hō͘ lí ê sìnsim bē
sitlo̍h. Tng lí koh oat tòtńg ê sî, tio̍h ài kiankò͘ lí ê hiaⁿtī ê sìnsim.”
22 : 33 Pítek kóng: ”Chú à, Góa íkeng chúnpī hósè, chiū sī
khì chēkaⁿ he̍k sī siūsí, lóng kap Lí chòhóe!”
22 : 34 Iaso͘ kóng: ”Pítek, Góa kā lí kóng, kináji̍t ke
iáubē thî íchêng, lí ē saⁿ pái m̄ jīn Góa.”
22 : 35 Iaso͘ koh kā in kóng: ”Góa chêng phài lín chhut khì
ê sî, kiò lín bián tòa chîⁿ, bián phāiⁿ hênglí kap ê, kám iau ū khiàm siáⁿmih ?”
In ìn: ”Bô.”
22 : 36 Iaso͘ kóng: ”M̄ku , chit chūn ū chîⁿ ê tio̍h tòa
leh, ū hênglí ê tio̍h phāiⁿ leh, bô to ê lâng, tio̍h khì bē saⁿ lâi bé to.
22 : 37 Góa kā lín kóng: ”Kengchheh ū kìchài:「I hō͘
lâng sǹgchò hoānhoat ê lâng.」Chit kù
ōe ē tī Góa ê sinchiō͘ⁿ ènggiām, inūi he sī koanhē Góa ê tāichì íkeng oânsêng à.”
22 : 38 In kóng: ”Chú à, chhiáⁿ Lí khòaⁿ leh! Chia ū nn̄g ki
to.” Iaso͘ kóng: ”Áne ū kàu à.”
22 : 39 Iaso͘ kiâⁿ chhut khì, chiàu I ê si̍pkoàn ǹg Kanná soaⁿ
khì, ha̍kseng tòe tī āubīn.
22 : 40 Kàu hit só͘chāi, chiū tùi in kóng: ”Lín tio̍h kîtó,
chiah bē tú tio̍h chhìthàm.”
22 : 41 I chiū līkhui in tāiiok ū hiat chi̍t lia̍p chio̍hthâu
ê hn̄g, khì kūi tī hia kîtó,
22 : 42 “Pē à! Lí nā ē sái, tio̍h kā chit ê poe sóakhui,
chóng sī, m̄-thang chiàu Góa ê ìsù, sī chiàu Lí ê ìsù lâi oânsêng.”
22 : 43 Ū chi̍t ūi thiⁿsài án thiⁿténg lâi ǹg I hiánhiān, kethiⁿ
I ê khùila̍t.
22 : 44 Iaso͘ huisiông aithòng, kîtó koh khah pekchhiat. I
só͘ lâu ê kōaⁿ nā chhiō͘ⁿ tōa tih ê hoeh tih lo̍h tô͘kha.
22 : 45 I kîtó soah, chiū khí lâi khì kàu ha̍kseng hia,
khòaⁿ in inūi iusiong chôaⁿ lóng khùn khì,
22 : 46 chiū kā in kóng: ”Lín sī ánchóaⁿ leh khùn? Khí lâi
kîtó, chiah bē tú tio̍h chhìthàm!”
22 : 47 I iau teh kóng ê sî, khòaⁿ tio̍h chi̍t tīn lâng kiâⁿ lâi.
Cha̍pjī ê ha̍kseng tiong, kiòchò Iûtāi è, kiâⁿ chò chêng, lâi óa Iaso͘ beh chim
I.
22 : 48 Iaso͘ kā i kóng: ”Iûtāi! Lí ēng chimchhùi chò àmhō,
lâi chhutbē Góa sī bô?”
22 : 49 Tī sinpiⁿ ê ha̍kseng khòaⁿ sèbīn chin bái, chiū
kóng: ”Chú à! Goán kiah to lâi phut in hó bô?”
22 : 50 Kîtiong ū chit ê lâng ǹg tōa chèsi ê po̍kjîn phut
chi̍t to, kā i chiàⁿ pêng ê hīⁿá siah lo̍h lâi.
22 : 51 Iaso͘ kóng: ” Tāichì íkeng áne, chhutchāi in khì!”
Chiū bong hit ê lâng ê hīⁿá, lâi I hó i.
22 : 52 Iaso͘ tùi hia ê lâi lia̍h I ê chèsi tió͘ⁿ hām siútiān
koaⁿ kap tió͘ⁿló kóng: ”Lín kiah to kap thûi lâi lia̍h Góa, nā chhiō͘ⁿ leh
lia̍h chat leh?
22 : 53 Góa ta̍k ji̍t hām lín chòhóe tī sèngtiān, bô beh hēchhiú.
Chóngsī, chit má chiah ha̍h lín ê sîchūn, iā sī o͘àm sèle̍k ê sî.”
22 : 54 In chiū lia̍h Iaso͘, kā I chhōa cháu, ah I khì chèsi
tió͘ⁿ ê chhù. Pítek thauthaua tóe tī āubīn.
22 : 55 In tī tiâⁿ ê tiongng khí hóe, chē chòhóe, Pítek mā
chē tiàm hia.
22 : 56 Ū chi̍t ê lúpī tùi hóeiām tiong, khòaⁿtio̍h Pítek mā
chē tī hia, chiū chùba̍k khòaⁿ i, kóng: ”Chit ê lâng pêngsiông mā sī kap hit ê
lâng chòhóe.”
22 : 57 Pítek soah hó͘ⁿjīn kóng: ” Oeh! Góa m̄ bat i.”
22 : 58 Kòe chi̍t sîá, koh ū chi̍t ê lâng khòaⁿtio̍h i, mā
kóng: ”Lí hām hit ê lâng mā sī siāng tóng ê.” Pítek sûi ìn: ” Èⁿ, Góa m̄ sī
lah!”
22 : 59 Kòe chiâⁿ tiámcheng, koh ū chi̍t ê lâng chiaⁿ khéngtēng
kóng: ”I hām hit ê lâng sī chi̍t tóng ê, inūi i mā sī Kalīlī lâng.”
22 : 60 Pítek ìn: ” Taⁿ lí sī leh kóng siáⁿ! Góa thiaⁿ lóng
bô!” Ōe chiah iau teh kóng,
ke chiū thî à!
22 : 61 Chú oa̍ttńg sin chùba̍k khòaⁿ Pítek, Pítek chiah
siō͘ⁿ khí Iaso͘ ū kā kóng: ” Kináji̍t ke thî chin chêng, lí ē saⁿ pái m̄ jīn
Góa.”
22 : 62 I chiū cháu chhut khì gōabīn, háu kah chiaⁿ chhichhám.
22 : 63 Hia ê kò͘siú Iaso͘ ê peng, híláng I koh phah I.
22 : 64 Mā ng I ê ba̍kchiu, mn̄g I kóng: ”Lí sī sianti, kā
goán kóng, sī siáⁿlâng phah Lí?”
22 : 65 In koh ēng chēchē ōe bújio̍k I.
22 : 66 Thiⁿkng ê sî, só͘ū hōetn̂g ê tió͘ⁿló kap chèsi tió͘ⁿ
hām kàusu lâi chip chòhóe, chiong Iaso͘ ah khì in ê gīhōe,
22 : 67 mn̄g: ” LÍ nā sī Kitok, tio̍h kā goán kóng.” Iaso͘
ìn in kóng:”Góa nā kā lín kóng, lín mā m̄ sìn;
22 : 68 Góa nā mn̄g lín, lín mā bô hoattō͘ hôetap, ásī pàng
Góa.
22 : 69 Tùi taⁿ íāu, Góa beh chē tī SiōngChú ê chiàⁿ pêng.”
22 : 70 In ta̍kê lóng kóng: ”Áne, Lí sī SiōngChú ê kiáⁿ?” Iaso͘
ìn: ”Lín áne kóng, Góa púnlâi chiū sī.”
22 : 71 In kóng: ”Kám tio̍h koh ū siáⁿmih chèngkù leh? Inūi
lán lóng íkeng chhinchū thiaⁿtio̍h I chhinchhùi kóng ê ōe.”
2019/03/27
08 : 43
2025.08.06. Siukái tī LâmThâm
沒有留言:
張貼留言