23 : 1 Hit sî, choân hōetiô͘ⁿ ê lâng lóng khiā khí lâi, kā Iaso͘ ah khì Pília̍pto ê bīnchêng ,
23 : 2 khòngkò I: ”Goán hoatkak chit ê lâng bêhek lán ê kokbîn,
chó͘chí lâng la̍psòe hō Hôngtè, iáu koh chūchheng sī Kitok, sī ông.”
23 : 3 Pília̍pto mn̄g Iaso͘: ”Lí sī Iûthài lâng ê ông sī bô?”
Iaso͘ ìn: ” Sī lí kóng ê áne.”
23 : 4 Pília̍pto tùi hia ê chèsi tió͘ⁿ hām kûnchiòng kóng:
”Góa chhâ bô phòaⁿ I ū chōe ê chèngkù.”
23 : 5 M̄ku in koh khah keklia̍t kóng: ”I tùi Kalīlī séng
khaisí siàntōng bînchiòng, tī Iûthài choânkok cháu thàuthàu, thoân I ê tōlí,
sīmchì lâi kàu tī chia.”
23 : 6 Pília̍pto chi̍t ē thiaⁿtio̍h ū lâng thêkhí Kalīlī,
chiū mn̄g, chit ê lâng kám sī Kalīlī lâng.
23 : 7 I chit ē chaiiáⁿ chit ê ànkiāⁿ sī siok Hilu̍t só͘
koánhat, chiū kā I sàng khì Hilu̍t hia. Hit sî, Hilu̍t tú hó iā tī Iâlō͘satléng.
23 : 8 Tng Hilu̍t chit ê khòaⁿtio̍h Iaso͘, chiū kek kî hoaⁿhí,
inūi bat thiaⁿ kòe koanhē Iaso͘ ê tāichì, tn̂gkú ílâi chiū siō͘ⁿ beh kìⁿ Iaso͘,
iā ē tàng khòaⁿtio̍h I kiâⁿ chi̍t ê sînjiah,
23 : 9 só͘í mn̄g Iaso͘ chiokchē ōe, m̄ku I lóng bô kā i ìn
kah pòaⁿ kù.
23 : 10 Chèsi tió͘ⁿ hām kàusu itti̍t khiā leh, huisiông keklia̍t
khòngkò I.
23 : 11 Hilu̍t kap i ê peng chòehóe bújio̍k Iaso͘, hilāng i
koh kā chhēng chi̍t niá súi ê tn̂g phàu, chiah chiong I sàng hêng Pília̍pto.
23 : 12 Hilu̍t kap Pília̍pto púnlâi sī sí tùithâu, chiū tī
chit ji̍t chiâⁿchò pêngiú.
23 : 13 Pília̍pto tiàuchi̍p chèsi tió͘ⁿ hām koaⁿoân kap bînchiòng,
23 : 14 chiū tùi in kóng: ”Lín ah chit ê lâng lâi góa chia,
kò I siàntōng jînbîn, lín khòaⁿ góa mā tī lín ê bīnchêng íkeng símmn̄g kòe I,
chhâ bô lín só͘ kò ê sūsi̍t thang phòaⁿ I ê chōe;
23 : 15 liân Hilu̍t mā sī áne jīmtēng, chiah kā I sàng tńg lâi.
Áne thang chai, I pèng bô chò kòe siáⁿmih kai phòaⁿ síhêng ê tāichì.
23 : 16 só͘í, góa ē kā I phah liáu āu, chiū ka pàng tńgkhì.
23 : 17 (Ta̍k nî tī Pôaⁿkòecheh, chóngtok tio̍h chiàu kûnchiòng
ê iàukiû pàng chit ê hoānlâng.)
23 : 18 M̄ku chènglâng tōa siaⁿ hoah: ”Kā hit ê lâng chhú sí!
Tháupàng Paliappa hō͘ goán.”
23 : 19 Chit ê Palia̍ppa inūi tī siâⁿ lāi chokloān koh thâisí
lâng, pī koaiⁿ loh kaⁿ.
23 : 20 Pília̍pto khah ài pàng Iaso͘, chiū koh chài tùi
chènglâng kóng chi̍t pái.
23 : 21 M̄ku in hoah: ”Kā I tèng si̍pjīkè! Kā I tèng si̍pjīkè!”
23 : 22 Pília̍pto tēsaⁿ pái tùi in kóng: ”Sī ánchóaⁿ? I sī ū
chò siáⁿmih hoānhoat ê tāichì? Góa chhâ bô I ū engkai chhúsí ê chōe, só͘í, góa beh
kā I phah liáu chiū pàng I tńgkhì.”
23 : 23 In itti̍t tōa siaⁿ hoah, iàukiû Pília̍pto kā Iaso͘
tèng si̍pjīkè. Chòeāu in kap chèsi tió͘ⁿ ê siaⁿ ta̍t kàu bo̍kte̍k.
23 : 24 Pília̍pto chiū chiàu in ê iàukiû tēng Iaso͘ ê chōe,
23 : 25 chiong in iàukiû hit ê chokloān thâilâng, pī koaiⁿ
loh kaⁿ ê hoānlâng pàng chhut khì, khiok kā Iaso͘ kau hō͘ in, sûichāi in chhúlí.
23 : 26 Tng pengá ah Iaso͘ līkhui ê sî, tī lō͘tiong ū chit ê
Kó͘līnāi lâng, miâ chò Sebûn, án chngkha lâi, hō͘ in lia̍h lâi, kiò i giâ si̍pjīkè
tòe Iaso͘ āubīn kiâⁿ.
23 : 27 Ū chin chē lâng tòe Iaso͘, kîtiong ū chi̍t kóa hūlú, ūi I pisiong aikhàu.
23 : 28 Iaso͘ oa̍ttńg sin tùi in kóng: ”Iâlō͘satléng ê hūlú,
m̄ bián ūi Góa aikhàu, tio̍h ūi katī kap lín ê jîlú lâi khàu.
23 : 29 Inūi sî teh beh kàu, lâng ē kóng：「Bē hoâiīn
ê kap m̄ bat hoâiīn ê, bô kā eⁿá chhīni ê hūlú ū hokkhì!」
23 : 30 Hit sî , lâng beh ǹg tōa soaⁿ kóng:「Kā goán
am khí lâi!」Kā soaⁿlūná
kóng :「Kā goán
khàm khí lâi!」
23 : 31 “ Inūi in liân chheⁿchhùi ê chhiū to áne chò, hia ê
ta khì ê ē pī ánchóaⁿ chhúlí à?”
23 : 32 Lēnggōa ū nn̄g ê hoānlâng, kap Iaso͘ hō͘ lâng ah lâi chòhóe
chhú síhêng.
23 : 33 In lâi kàu chit ê miâ chò Thâukhak óaⁿ ê só͘chāi, tī
hia chiong Iaso͘ kap in tèng tī si̍pjīkè téng, chi̍t ê tī tò pêng,
chi̍t ê tī chiàⁿ pêng.
23 : 34 Iaso͘ kóng: ”Apâ, chhiáⁿ Lí siàbián in, inūi in m̄ chaiiáⁿ
in só͘ chò ê.” Hia ê pengá thiukhau, lâi pun Iaso͘ ê saⁿ.
23 : 35 Bînchiòng khiā tī hia leh khòaⁿ. Chi̍t kóa koaⁿoân
mā thíchhiò Iaso͘ kóng: ”I bat kiù pa̍tlâng, I nāsī Kitok, sī SiōngChú só͘ kéngsoán
ê, taⁿ I tio̍h kiù katī ò͘!”
23 : 36 Hiah ê pengá mā hilāng I, kiâⁿ chin chêng iōng chhò͘
hō͘ I lim .
23 : 37 Kóng: ”Lí nāsī Iûthài lâng ê ông, tio̍h kiù Lí katī!”
23 : 38 Tī Iaso͘ ê thâukhak téngbīn ū chi̍t tè chōechn̄g ê
pâiá, siá: ”Chit ê sī Iûthài lâng ê ông.”
23 : 39 Chòhóe tèng tī hia ê nn̄g ê hoānlâng, kîtiong chi̍t ê
bú-jio̍k I, kóng: ”Lí kám m̄ sī Kitok mà? Tio̍h kiù Lí katī, mā lâi kiù goán!”
23 : 40 M̄ku lēnggōa hit ê sûi chhutsiaⁿ chekpī i, kóng: ”Lí
hām I siāngkhoán pī phòaⁿ síhêng , iau m̄ kiaⁿ SiōngChú sī bô?”
23 : 41 Lán siū chhúsí sī engkai ê, inūi lán ū hoān tōa chōe,
tānsī chi̍t ê lâng pèng bô chò kòe chi̍t hāng pháiⁿtāi.”
23 : 42 I ǹg Iaso͘ kóng: ”Iaso͘ à, tng Lí tī Lí ê kok lâilîm
ê sî, chhiáⁿ Lí ê kìtit góa!”
23 : 43 Iaso͘ kā i kóng: ”Góa si̍tchāi kā lí kóng, kináji̍t
lí ē kap Góa chòehóe tī lo̍khn̂g.”
23 : 44 Hit ê sîchūn chhaputto sī tiongtàu, choântē lóng àm sôsô,
itti̍t kàu epo͘ saⁿ tiám, ji̍tthâu pìⁿ àm khì;
23 : 45 Sèngtiān lāi ê pò͘lîá lia̍hkhui chò nn̄g pêng.
23 : 46 Iaso͘ tōa siaⁿ hoah: ”Pē à! Góa chiong Góa ê lênghûn
kāu hō͘ Lí.” Kóng liáu chiū tn̄gkhùi.
23 : 47 Hit ūi liân tió͘ⁿ khòaⁿtio̍h só͘ hoatseng ê tāichì,
chiū oló SiōngChú kóng: ”Chit ê chin-chiàⁿ sī bô chōe ê lâng.”
23 : 48 Ûi tī hia leh khòaⁿ ê bînchiòng, khòaⁿtio̍h só͘ hoatseng
ê sū lóng tûi in ê hengkhám’á tńg khì.
23 : 49 Hiah ê bat Iaso͘ ê lâng, hām án Kalīlī séng tòe I
lâi ê hūlú, mā iau khiā tī hn̄ghn̄g leh khòaⁿ chiah ê tāichì.
23 : 50 Ū chi̍t ê miâ chò Ioksek ê, i sî gīoân, chò lâng
liôngsiān koh ū chènggī kám;
23 : 51 I bô jīmtông kîthaⁿ gīoân ê kèchhek hām hêngtōng. I
sī chi̍t ūi Iûthài séng ê Alīmáthài ê lâng, mā sī leh tánthāi SiōngChú koktō͘
ê.
23 : 52 I khì kìⁿ Pília̍pto, chhéngkiû siubai Iaso͘ ê sinsi,
23 : 53 chiū khì kā Iaso͘ ê sinsi tùi si̍pjīkè téng lūi lo̍h
lâi, iōng iùtēpò͘ pau hósè, khǹg tī chi̍t ê phah hó ê chio̍hbōng lāi; hit lāibīn
iáu m̄ bat ū lâng ēngkòe.
23 : 54 Hit ji̍t sī pài gō͘, Anhiohji̍t ê sîkan teh beh kàu à.
23 : 55 Hiah ê hām Iaso͘ án Kalīlī séng chòhóe lâi ê hūlú
tòe tī āubīn, ū khòaⁿtio̍h bōng kap in ánchóaⁿ anhòng Iaso͘ ê sinsi.
23 : 56 In chiū kín tńg khì, chúnpī phangliāu kap phangiû.
Anhiohji̍t ê sîkan khaisí, in mā chiàu lu̍thoat ê kuitēng hio̍hkhùn.
2019/04/03 12 : 15
2025.08.07. Siukái tī Lâmthâm
沒有留言:
張貼留言