24 : 1 M̄ku tī chhit ji̍t ê thâu chi̍t ji̍t, thiⁿ beh kng ê sî, in kap chi̍t kóa lâng chiū tòa só͘ chúnpī ê phangliāu khì kàu Iaso͘ ê bōng chêng,
24 : 2 in khòaⁿtio̍h chio̍h mn̂g íkeng kō khui,
24 : 3 in sûi ji̍p khì, soah bô khòaⁿtio̍h Iaso͘ ê sinsi.
24 : 4 Tng in iau teh siō͘ⁿ bē hiáu ê sî, hutjiân ū nn̄g ê
lâng, chhēng kng phiângphiâng ê saⁿ lâi khiā tī in ê piⁿá.
24 : 5 In sûi kiaⁿ tio̍h, lóng kā bīn phak lo̍h thô͘kha.
Hit nn̄g ê chiū kā in kóng:”Lín sī ánchóaⁿ tī silâng ê tiongkan leh chhōe oa̍h lâng?
24 : 6 I bô tī chia, I íkeng kohoa̍h. Tio̍h ài ē kìtit I
iau tī Kalīlī séng ê sî, sī ánchóaⁿ kā lín kóng ê,
24 : 7「Góa ittēng
ē hō͘ lâng kau tī chōe lâng ê chhiú, pī in tèng tī si̍pjīkè téng, koh tē saⁿ ji̍t
ē kohoa̍h.」
24 : 8 Hiah ê hūlú chiū siō͘ⁿ khí Iaso͘ só͘ kóng ê ōe,
24 : 9 Chôaⁿ lîkhui bōng chhù tńg khì, kā chiah ê tāichì
lóng túi cha̍pit ê ha̍kseng kap kîthaⁿ ê lâng kóng.
24 : 10 Kā ha̍kseng kóng chiah ê tāichì ê hūlú chiū sī
Boa̍ttāilia̍p ê Málīa hām Iokaná, íkip Ngákok ê lāubú Málīa, iáu ū kap in chòtīn
ê kúi ê hūlú.
24 : 11 In só͘ kóng ê ōe, ha̍kseng bô kā i tòng chò chi̍t
hôe sū, mā m̄ siongsìn.
24 : 12 M̄ku, Pítek peh khí lâi, cháu kàu bōng chêng,
thâukhak àⁿ lo̍h khì khòaⁿ lāibīn, ká nā khòaⁿtio̍h iùtē pò͘ khǹg tī chit pêng
nātiāⁿ, i chiū tńg khì in tau, tùi só͘ hoatseng ê tāichì siō͘ⁿ bē bêngpe̍k.
24 : 13 Siāng tī hit ji̍t, ha̍kseng tiongkan ê nn̄g ê the
beh khì chi̍t ê kiò chò Ímángo͘ ê chngthâu, kūlî Iâlō͘satléng tāikhài ū cha̍pit
konglí.
24 : 14 In ná kiâⁿ ná teh tâmlūn só͘ hoatseng ê tāichì.
24 : 15 In iau leh tâmlūn ê sî, Iaso͘ chhinsin óa lâi kap
in chòhóe kiâⁿ;
24 : 16 m̄ku, in ê ba̍kchiu kah na ū mi̍hkiāⁿ cha̍h leh,
soah jīn bē chhut Iaso͘.
24 : 17 Iaso͘ mn̄g in: ”Lín ná kiâⁿ ná teh tâmlūn siáⁿmih,
koh sī leh aisiong siàⁿhòe?”
24 : 18 In kîtiong chi̍t ê miâ chò Kekliûpa, ìn I kóng:
”Tòa tī Iâlō͘satléng ê lâng, kan taⁿ lí chi̍t ê m̄ chaiiáⁿ chit kúi ji̍t tī hia
só͘ hoatseng ê tāichì ê khoán?”
24 : 19 Iaso͘ ìn: ”Sī siáⁿmih tāichì?” In kóng:”Chiū sī
koanhē Násatle̍k lâng Iaso͘ ê tāichì, I sī chi̍t ê sianti, tī SiōngChú hām
chènglâng ê bīnchêng, só͘ kóng só͘ chò ê lóng chin ū koânlêng.
24 : 20 Goán hia ê chèsi tió͘ⁿ kap thâulâng kā ah khì
phòaⁿ síhêng, tèng si̍pjīkè.
24 : 21 Goán ithiòng só͘ kîthāi ê hit ūi beh lâi chinkiù
goán Íseklia̍t lâng ê, chiū sī I! M̄ niā áne, chú chiông chiah ê tāichì hoatseng
liáuāu, kàutaⁿ íkeng saⁿ ji̍t à!”
24 : 22 Iáu koh ū, tī goán tiongkan kúi ê hūlú hō͘ goán
chin ìgōa, in thàuchá chiū khì Iaso͘ ê bōng hia,
24 : 23 khòaⁿ bô I ê sengsi tī hit lāibīn, chiū tńglâi kā
goán kóng, in khòaⁿtio̍h thiⁿsài ǹg in hiánhiān, kā in kóng Iaso͘ íkeng kohoa̍h!
24 : 24 Goán tiongkan mā ū kúi ê khì bōng chhù, só͘ khòaⁿtio̍h
ê tāichì hām hia ê hūlú só͘ kóng ê siāngkhoán, m̄ku in bô khòaⁿtio̍h Iaso͘.”
24 : 25 Iaso͘ kā in kóng: ”Hó͘, lín ê sim ū kàu tūn neh!
Bē tàng siongsìn sianti só͘ kóng itchhè ê ōe.”
24 : 26 Kitok kám m̄ sī tio̍h seng kengkòe chiah ê khó͘lān,
chiah chin ji̍p I ê êngkng?”
24 : 27 Iaso͘ chiū chiong Sèngkeng só͘ kìchài koanhē I ê
tāichì kā in soatbêng, án Mô͘se hām chèng sianti khaisí kóng khí.
24 : 28 In teh beh kàu in beh khì ê chngthâu ê sî, Iaso͘
ná chhiō͘ⁿ beh kèsio̍k itti̍t kiâⁿ,
24 : 29 chiū biánkióng kā Iaso͘ lâu leh, kóng: ”Chhiáⁿ Lí
hām goán chòhóe tòa chia, inūi ji̍t íkeng àm, ji̍tthâu mā lo̍h soaⁿ à!” Iaso͘
chiū ji̍p chng, kap in chòhóe.
24 : 30 Iaso͘ kap in chē toh ê sî, the̍h piáⁿ chioksiā, jiânāu
pehkhui pun hō͘ in.
24 : 31 In ê ba̍kchiu chiah pī thíkhui, jīn chhut I sī Iaso͘.
M̄ku sûi bô khòaⁿtio̍h I.
24 : 32 In chiū hō͘siong kóng: ”Tng I hām láng kiâⁿ tī
lō͘ nih kap lán kóng ōe, koh soatbêng Sèngkeng ê sî, lán ê sim lāi kám bô chhinchhiō͘ⁿ
hóe leh to̍h?”
24 : 33 In sûisî khílâi, tńg khì Iâlō͘satléng, chhōe tio̍h
cha̍pit ê ha̍kseng chiū kap in chòhóe tī hia,
24 : 34 kóng: ”Chú chin chiàⁿ kohoa̍h à. I íkeng ǹg Sebûn
hiánhiān à!”
24 : 35 In nn̄g ê chiū chiong tī pòaⁿlō͘ só͘ tú tio̍h ê
tāichì, hām Iaso͘ pehpiáⁿ ê sî hō͘ in jīn chhut lâi ê kengkòe, lóng kóng hō͘ in
thiaⁿ.
24 : 36 In nn̄g ê iáu teh kóng chiah ê tāichì ê sî, Iaso͘
chhinsin khiā tī in ê tiongkan, kóng: ”Goān lín pêngan!”
24 : 37 In soah lóng chin kiaⁿhiâⁿ, lia̍h chò sī khòaⁿtio̍h
kúi.
24 : 38 “Lín sī ánchóaⁿ leh putan? Sim lāi leh giâugî?
24 : 39 Lín khòaⁿ Góa ê chhiú hām kha, si̍tchāi sī Góa
púnlâng, lín bong khòaⁿ māi leh, inūi kúi bô kut bô bah, m̄ku Góa lóng ū.”
24 : 40 I kóng soah, chiū kā chhiú hām kha hō͘ in khòaⁿ.
24 : 41 Ha̍kseng iáu teh hoaⁿhí kah m̄ káⁿ siongsìn ê sî,
Iaso͘ kóng: ”Lín ū siáⁿmih mi̍hkiāⁿ thang chia̍h bô?”
24 : 42 In chiū the̍h chi̍t tè hang hó ê hî hō͘ I .
24 : 43 I chiap kòe lâi, sūi tī in ê bīnchêng chia̍h hō͘
in khòaⁿ.
24 : 44 Iaso͘ chiū kā in kóng: ”Che chiūsī Góa iau kap lín
chòhóe ê sî kā lín só͘ kóng kòe ê, Mô͘se ê lu̍thoat, kap sianti ê chheh, Siphian
só͘ kìchài koanhē Góa ê tāichì lóng ittēng ê ènggiām.”
24 : 45 Tùi áne, I khui in ê simkhiàu, hō͘ in ē bêngpe̍k
Sèngkeng,
24 : 46 koh kā in kóng: ”Sèngkeng ū áne kìchài, só͘í Kitok
pitsu siūkhó͘, koh tī tesaⁿ ji̍t tùi silâng tiong kohoa̍h,
24 : 47 só͘í án Iâlō͘satléng khaisí, lín tio̍h hōng I ê
miâ thoân hóekái kap siàchōe ê tōlí kàu choân sèkài.
24 : 48 Lín chiūsī chiah ê tāichì ê kiànchèng jîn.
24 : 49 Góa beh phài Góa ê Pē só͘ èngún ê kàu tī lín ê
sinchiō͘ⁿ, m̄ku lín tio̍h ài tòa chi̍t ê siâⁿ lāi thènghāu, ti̍t kàu lín niásiū
tio̍h án téngbīn lâi ê koânlêng.”
24 : 50 Iaso͘ chhōa in chhut khì kàu Pektāinî, chiū giah
chhiú kā in chiokhok.
24 : 51 Leh kā in chiokhok ê sî, chiū līkhui in, hō͘
SiōngChú kā I thê seng chiō͘ⁿ khì thiⁿténg.
24 : 52 In chiū phak lo̍h khì pài I, chiah hoaⁿhoaⁿ híhí
tńg khì Iâlō͘satléng,
24 : 53 kèsiok ta̍k ji̍t tī sèngtiān lāi oló SiōngChú .
2019/04/13 Koh-oa̍h-cheh ê chêng chi̍t lé-pài
siōng-ngó͘ 09 : 01 oân-sêng chho͘-kó.
2025.08.09. siukái tī Lâmthâm
沒有留言:
張貼留言