Sútô͘ Hêngtoān Tē it chio͘ⁿ

1:1 Kèngài ê Thêohuilô tāijîn à: Tī góa só͘ siá ê thâu chi̍t pún chheh, ū kìchài Iaso͘ àn khíthâu só͘ chò kap só͘ kàutō ê tāichì,

1:2 itti̍t kàu I thongkòe Sèngsîn lâi chíkà só͘ kéngsoán ê sùtô͘ liáuāu, chiū pī chiap chiō͘ⁿthiⁿ ê ji̍tchí ûichí.

1:3 I sí liáuāu, iā tī sìcha̍p ji̍t kú ê kîkan, ēng chin chē chèngkù ǹg in hiánsī I púnlâng iau oa̍h teh, koh tùi in kóng iúkoan Siōngchú ê koktō͘ ê tāichì.

1:4 Iaso͘ hām in chūchi̍p ê sî, kautài in kóng: ”M̄ thang līkhui Iâlō͘satléng, tio̍h thènghāu Pē só͘ èngún ê lémi̍h, chiūsī lín àn Góa só͘ thiaⁿ tio̍h ê.

1:5 Iokhān sī ēng chúi kā lâng kiâⁿ sélé, m̄ku koh kòe kúi ji̍t, lín ē siū Sèngsîn ê sé.”

1:6 Só͘í, tng in chūchi̍p ê sî, mn̄g Iaso͘: ”Chú à, Lí beh tī chit ê sîchūn hoeho̍k Íseklia̍t ê ôngkok sī bô? ”

1:7 Iaso͘ kóng: ”Sîchūn kap kîji̍t m̄ sī lín ē tàng chai ê, sī Thiⁿpē katī ê koânpèng só͘ koattēng ê.

1:8 M̄ku Sèngsîn kànglîm tī lín ê sinchiō͘ⁿ, lín ē tit tio̍h lêngle̍k, koh tī Iâlō͘satléng, Iûthài choântē hām Satmálīa, ti̍t kàu thiⁿpiⁿ háikak ūi Góa chò chēchē kiànchèng.”

1:9 Chiah ê ōe kóng liáu, I tī in ê ba̍kchiu chêng pī thê siō͘ⁿthiⁿ, koh ū hûn lâi chiap I khì, in chiū bô khòaⁿtio̍h I.

1:10 Tng in ê ba̍kchiu iáu leh kimkim siòng Iaso͘ chiō͘ⁿthiⁿ ê sî, thu̍tjiân ū nn̄g ê chhēng pe̍hsaⁿ ê lâng lâi khiā tī in sinpiⁿ,

1:11 kóng: ”Kalīlī lâng à, lín ná ē khiā tī chia leh khòaⁿ thiⁿ? Chit ūi līkhui lín pī chiap siō͘ⁿthiⁿ ê Iaso͘, lín khòaⁿ I áne chiō͘ⁿthiⁿ, I mā ē siāngkhoán áne koh lâi.”

1:12 Sòa lo̍h in án kiò chò Kaⁿná ê soaⁿ tńgkhì Iâlō͘satléng, kūlî bôhn̄g, sī Anhiohji̍t só͘ únchún ê.

1:13 Tng in li̍p siâⁿ, chiū peh khí lih in tòa ê hit keng chhù ê lâuténg, tī hia ū Pítek, Iokhān, Ngákok, Anteklia̍t, Huile̍k, Tomá, Patolômái kap Máthài, Ale̍khui ê kiáⁿ Ngákok, Jia̍tkông tóng ê Sebûn, Ngákok ê kiáⁿ Iûtāi.

1:14 In kap kúi nā ê hūlú, íkip Iaso͘ ê lāubú Málīa, Iaso͘ ê hiaⁿtī chòhóe kèsio̍k tângsim pekchhiat kîtó.

1:15 Hit kúi ji̍t tiong, tāiiok ū chi̍tpah jīcha̍p lâng, Pítek khiā khí lâi kóng:

1:16 “Kokūi hiaⁿtī chímōe! Sèngsîn thongkòe Tāipi̍t ê chhùi só͘ ūgiân ū kì tī kengchheh ê, chiū sī koanhē chhōa lâng lâi lia̍h Iaso͘ ê Iûtāi ê tāichì, ittēng ē ènggiām.

1:17 I púnlâi sī goán tiongkan ê chi̍t ê, koh ū kap goán chòhóe kangchok ê chithūn.

1:18 Tng chit ê lâng ēng i só͘ chò putgī ê tāichì tit tio̍h ê chîⁿ, bé chi̍t khu hn̂g, tòthâu chai poa̍h lo̍h sí tī hia, paktó͘ piakkhui, tn̂gá tn̂gtō͘ lóng cháu chhutlâi.

1:19 Tòa tī Iâlō͘satléng ê lâng lóng chaiiáⁿ chi̍t hāng tāichì, chôaⁿ chiàu in ê kónghoat kā hit khu hn̂g hō chò” Akektāimá ”, chiūsī “Hoeh ê hn̂g” ê ìsù.

1:20 Inūi Siphian ū kìchài: ”Tio̍h hō͘ i ê chhù honghòe, bô lâng tòa tī hia; koh kóng, tio̍h hō͘ pa̍tlâng lâi tāithè i ê chitūi.”

1:21 Só͘í tio̍h tī Chú Iaso͘ tiàm lán tiongkan chhutji̍p ê sî, chiū chūthâu kàubé hām goán chòhóe ê lâng, soán chi̍t ūi,

1:22 hit ê lâng chiūsī chū Iokhān kiâⁿ sélé khaisí, ti̍t kàu Chú līkhui lán pī chiap chiō͘ⁿthiⁿ ûichí, lóng ū kap goán chòhóe, lâi chò Iaso͘ kohoa̍h ê kiànchèng-jîn ê.”

1:23 In chiū thêmiâ nn̄g ê lâng, chi̍t ê kiò chò Pasatpa, koh hō chò Iûsūto͘ ê Ioksek, hām Máthêa.

1:24 In chiū kîtó kóng: ”Chú à, Lí chai chènglâng ê simsu, kiû Lí tùi chit nn̄g ê lâng tiongkan, pò goán chaiiáⁿ tó chi̍t ūi sī Lí só͘ kéngsoán ê, beh lâi tamtng sùtô͘ ê chitūi.

1:25 Inūi Iûtāi íkeng hòngkhì i, kiâⁿ katī ê lō͘ à.”

1:26 Jiânāu, in thiu khauá, thiu tio̍h Máthêa, i chiū hām cha̍pit ê sùtô͘ chòtīn.

                                  2019/04/13     

                                             2025.08.13. Siukái tī Lâmthâm