Sùtô͘ Hêngtoān Tē cha̍p chio͘ⁿ

10:1 Tī Kaisatlīa ū chi̍t ê lâng miâ chò Konîliû, sī Ìtāilī iâⁿ ê liântió͘ⁿ.

10:2 I sī chi̍t ê khiânsêng ê lâng, hām choânke lóng kèngùi Siōngchú, iā chinchè chinchē lâng, koh siôngsiông ǹg Siōngchú kîtó.

10:3 Ū chi̍t ji̍t, tāiiok tī ēpo͘ saⁿtiám, i tī īⁿsiōng tiong chin chhengchhó khòaⁿtio̍h Siōngchú ê thiⁿsài ji̍p lâi in tau, kiò i ê miâ,” Konîliû!”

10:4 Konîliû chùsîn chi̍t ē khòaⁿ, kiaⁿchi̍t tiô kóng:” Chú à, ū siáⁿmih tāichì sī bô?” Thiⁿsài ìn:” Lí ê kîtó hām chinchè íkeng pī Siōngchú chiapla̍p kap kìliām.

10:5 Lí chit má sūi phài lâng khì Iokphàⁿ, iauchhiáⁿ hit ūi hō chò Pítek ê Sebûn lâi.

10:6 I tòa tī chò phôe saihū Sebûn ê chhù, i ê chhù tī háikîⁿ.”

10:7 Kap i kóng ōe ê thiⁿsài līkhui āu, Konîliû sūi kiò nn̄g ê koánke hām chi̍t ê khiânsêng ê thoânlēngpeng lâi,

10:8 Kā chiah ê tāichì lóng kóng hō͘ in thiaⁿ, chiū phài in khì Iokphàⁿ.

10:9 Kàu tē jī ji̍t, in teh beh kàu Iokphàⁿ ê sî tāiiok sī tiongtàu, Pítek khí lih chhùténg kîtó.

10:10 I soah kámkak paktó͘ iau, siō͘ⁿ beh chia̍h mi̍hkiāⁿ. I ê chhùchú mā leh kā i chúnpī ngó͘chhan ê sî, m̄ku i ê lênghûn soah khòaⁿtio̍h chi̍t ê ōebīn:

10:11 I khòaⁿtio̍h thiⁿkhui, ū chi̍t ê mi̍hkiāⁿ lūi lo̍h lâi, náchhiō͘ⁿ chi̍t tè sìkakthâu pa̍k leh ê tōatè pò͘ tūi tī thô͘kha,

10:12 hit lāibīn ū tēsiong ta̍kchióng ê cháusiù hām thângthōa, koh ū thiⁿténg ê poechiáu;

10:13 Ū chi̍t ê siaⁿ kā i kóng:” Pítek, khí lâi, kā in thâi lâi chia̍h!”

10:14 Pítek ìn:” Chú à, chhianbān m̄ thang! Inūi góa m̄ bat chia̍h kòe lahsap, ásī bô chhengkhì ê mi̍h.”

10:15 Hit ê siaⁿ koh kā i kóng tē jī pái:” Siōngchú só͘ hō͘ i chhengkhì ê, lí m̄ thang khòaⁿ chò acha ê.”

10:16 Liânliân áne saⁿ pái liáuāu, hit ê mi̍hkiāⁿ sūi tńgkhì thiⁿténg.

10:17 Tng Pítek iáu teh siō͘ⁿ i só͘ khòaⁿtio̍h ê chit ê īⁿsiōng sī siáⁿmih ìsù ê sî. Konîliû só͘ phài lâi ê lâng íkeng kiâⁿ lâi kàu Sebûn in tau, khiā tī mn̂ggōa,

10:18 tōasiaⁿ hiu:” Kám ū chit ê kiò chò Pítek ê Sebûn tòa tī chia?”

10:19 Pítek iáuteh siō͘ⁿ hit ê īⁿsiōng ê sî, Sèngsîn kā i kóng:” Ū saⁿ ê lâng lâi chhōe lí.

10:20 Tio̍h kóaⁿkín khí lâi, lo̍hkhì kap in chòhóe khì, m̄ bián hoâigî, in sī Góa só͘ phài lâi ê.”

10:21 Pítek sūi lo̍hkhì kìⁿ in, kóng:” Góa chiūsī lín só͘ beh chhōe ê lâng, lín ūi siáⁿmih lâi chhōe góa?”

10:22 In ìn:” Konîliû liântió͘ⁿ phài goán lâi. I sī chit ê chèngti̍t koh kèngùi Siōngchú ê lâng, iā siū só͘ ū ê Iûthàilâng chunkèng. I siū chi̍t ūi sèng thiⁿsài ê chísī, lâi iauchhiáⁿ lí khì in tau, thang thiaⁿ lí ê kàutō.”

10:23 Pítek chiū chhiáⁿ in ji̍pkhì, lâu in tī hia kòemê. Thiⁿkng āu, chiū kap in chòhóe khì, siângsî mā ū kúi ê Iokphàⁿ ê hiaⁿtī hām i chòhóe khì;

10:24 Koh kòe chi̍t ji̍t, in kiâⁿ kàu Kaisatlīa, Konîliû íkeng iauchhiáⁿ i ê chhinpêng hóiú chi̍póa lâi tánhāu i.

10:25 Tng Pítek ji̍pmn̂g ê sî, Konîliû sūi gêngchiap i, phak lo̍hkhì tī i ê khachêng pài i.

10:26 M̄ku, Pítek khiok khan i khílâi, kóng:” Chhiáⁿ lí khílâi, góa māsī lâng.”

10:27 Pítek hām i ná kiâⁿ ná kóng, ji̍p chhùlāi ê sî, khòaⁿtio̍h chinchē lâng íkeng chūchi̍p tī hia,

10:28 Chiū tùi in kóng:” Lín chaiiáⁿ, Iûthàilâng ê lu̍thoat sī kìmchí in kap pa̍tcho̍k ê lâng kaupôe lâióng, m̄ku Siōngchú íkeng chísī góa, bôlūn siáⁿmih lâng lóng bēsái kā i khòaⁿchò bô sèngkiat ásī acha ê.

10:29 Só͘í góa pī lín iauchhiáⁿ ê sî, bô thesî chiū lâi. Taⁿ chhiáⁿ mn̄g:” Lín sī ánchóaⁿ chhiáⁿ góa lâi chia?”

10:30 Konîliû ìn:” Sì ji̍t chêng, góa kìmchia̍h kàu tī chit ê sî, tāiiok ēpo͘ saⁿtiám, tu tī chhùlāi leh kîtó, hutjiân ū chi̍t ê lâng, chhēng kng piàngpiàng ê saⁿ khiā tī góa ê bīnchêng,

10:31 kóng:「Konîliû , Siōngchú íkeng thiaⁿtio̍h lí ê kîtó, mā kìtit lí só͘ chò hō͘ hia ê ū suiàu ê lâng ê tāichì.

10:32 Lí tio̍h phài lâng khì Iokphàⁿ, iauchhiáⁿ hit ê hōchò Pítek ê Sebûn lâi, i tòa tī chò phôe saihū Sebûn ê chhù, hit keng chhù tī háipiⁿ. Tng i lâi ê sî, i beh tùi lí kóng ōe.

10:33 Só͘í góa sūi phài lâng khì chhiáⁿ lí lâi, chin hoaⁿhí lí lâi goán chia. Hiānchāi, goán lóng tī Siōngchú ê bīnchêng, beh lâi thiaⁿ Siōngchú bēnglēng lí kā goán kóng ê ōe.”

10:34 Pítek chiū kóng:” Góa si̍tchāi liáukái Siōngchú tùi lâng bô chhapia̍t thāigū.

10:35 Bôlūn tī tó chi̍t ê kokka, kèngùi Siōngchú, kiâⁿ chò chèngti̍t ê lâng, lóng pī Siōngchú chiapla̍p.

10:36 Siōngchú thongkòe Iaso͘ Kitok thoân hôpêng ê hokim, chiong chit ê chintō sù hō͘ Íseklia̍t lâng.

10:37 Lín mā chai, án Iokhān thoân sélé ê tōlí íāu, tùi Kalīlī khaisí, thoân kàu Iûthàiséng choântē.

10:38 Siōngchú ánchóaⁿ hō Násatle̍klâng Iaso͘ chhiongmóa Sèngsîn kap lêngle̍k, I chiū khì tak só͘chāi kiâⁿ hósū, ihó itchhè hō͘ siâsîn apchè ê lâng, inūi Siōngchú kap I tôngchāi.

10:39 Goán chiūsī I tī Iûthàilâng ê só͘chāi kap Iâlō͘satléng só͘ kiâⁿ itchhè ê sū ê kiànchèngjîn. In soah kā I tèngsí tī si̍pjīkè téng.

10:40 Tē saⁿ ji̍t, Siōngchú hō͘ I kohoa̍h, koh hō͘ I chhuthiān;

10:41m̄sī hō͘ chènglâng khòaⁿ, kantaⁿ tùi goán chiah ê hō͘ Siōngchú tāiseng kéngsoán lâi kā I chò kiànchèng ê lâng hiánhiān. Goán chiah ê lâng chiūsī tī I tùi sílâng tiong kohoa̍h liáuāu kap I chòhóe limchia̍h ê lâng.

10:42 I bēnglēng goán thoân hokim hō͘ chènglâng, chèngbêng I sī Siōngchú só͘ līmbēng lâi chò oa̍hlâng kap sílâng ê símphòaⁿkoaⁿ.

10:43 Chèng sianti iā kā I chòchèng, chiūsī só͘ ū sìn I ê lâng ittēng ē tàng óakhò I ê miâ tittio̍h siàchōe.」”

10:44 Pítek iau leh kóngōe ê sî, Sèngsîn chiū kànglîm tī só͘ ū thiaⁿ tōlí ê lâng ê sinchiō͘ⁿ.

10:45 Hia ê kap Pítek án Iokphàⁿ chòhóe lâi ê Iûthàilâng ê sìntô͘, khòaⁿtio̍h Sèngsîn ê lémi̍h iā sù hō͘ gōakoklâng chiū tōa tio̍hkiaⁿ;

10:46 inūi thiaⁿtio̍h in ēng pa̍tchióng gúgiân leh oló Siōngchú ê úitāi.

10:47 Pítek chiū kóng:” Chiah ê lâng íkeng kap lán siāngkhoán niásiū Sèngsîn, ū siáⁿlâng ē tàng chó͘tòng in niásiū chúi ê sélé?”

10:48 Chiū bēnglēng in hōng Iaso͘ Kitok ê miâ niá sélé. In chhiáⁿ Pítek koh kap in tòa kúi nā ji̍t.

   2025.08.24. Siukái tī Lâmthâm