Sùtô͘ Hêngtoān Tē káu chio͘ⁿ

9:1 Sólô iûgoân kèsio̍k khiónghat beh khì thâi Chú ê bûntô͘, chiū khì kìⁿ Tōachèsi,

9:2 iaukiû i siá phoe hō͘ Tāimásek ê kok hōetn̂g, únchún i nā tútio̍h sìnkhò chit ê Chintō ê lâng, bôlūn lâmlú, lóng ēsái kā in pak khí lâi, ah khì Iâlō͘satléng.

9:3 Tng Sólô tehbeh kiâⁿ kàu Tāimásek ê sî, hutjiân tùi thiⁿténg ū kng chiò tī i ê sìkho͘ûi,

9:4 I sūi poa̍hlo̍h tī thô͘kha, thiaⁿtio̍h chi̍t ê siaⁿ kā i kóng:” Sólô! Sólô! Lí sī ánchóaⁿ leh pekhāi Góa?”

9:5 I ìn:” Chú à! Lí sī siáⁿmihlâng?” Chú kóng:” Góa chiūsī lí só͘ pekhāi ê Iaso͘.

9:6 Khí lâi, li̍pkhì siâⁿnih, ū lâng ē chísī lí engkai chò ê tāichì.”

9:7 Sólô ê tangphōaⁿ thêng tī hia, bô kóng ōe, kannā thiaⁿtio̍h siaⁿ, m̄ku bô khòaⁿtio̍h lâng.

9:8 Sólô án thô͘kha peh khí lâi, thíkhui ba̍kchiu ê sî, soah khòaⁿ lóng bô. In chiū khan i ê chhiú, chhōa i ji̍pkhì Tāimásek siâⁿ;

9:9 I ū saⁿji̍t kú, ba̍kchiu bē tàng khòaⁿ, bē chia̍h iā bē lim.

9:10 Hitchūn, tī Tāimásek ū chi̍t ê bûntô͘ hō chò Anánîa. Chú tī īⁿsiōng tiong tùi i kóng:“ Anánîa!” I ìn:” Chú, góa tī chia.”

9:11 Chú kā i kóng:” Khí lâi! Khì hit tiâu hō chò Ti̍tke, tī Iûtāi ê chhù thàmhóng chi̍t ê Tāisò͘ lâng, kiò chò Sólô ê, li ē khòaⁿtio̍h i túleh kîtó,

9:12 mā ē khòaⁿtio̍h chi̍t ê hōchò Anánîa ê, kiâⁿ ji̍plâi ēng chhiú hōaⁿ tī i ê sinchiō͘ⁿ, hō͘ i ētàng koh khòaⁿkìⁿ.”

9:13 Anánîa hôetap Chú kóng:” Chú à, Góa thiaⁿkìⁿ chinchē lâng kóng: Chit ê lâng tī Iâlō͘satléng ánchóaⁿ pekhāi Lí ê bûntô͘,

9:14 koh i lâi chia, ū Tōachèsi ê siūkoân thang lia̍h só͘ū kiûkiò Lí ê miâ ê lâng.

9:15 Chú kā i kóng:” Lí chò lí khì! I sī Góa só͘ kéngsoán ê khìkhū, beh tī gōakoklâng kap kunông hām Íseklia̍tlâng ê bīnchêng soaniông Góa ê miâ.

9:16 Góa iā beh chísī i, inūi Góa ê miâ siū chēchē ê khó͘lān.”

9:17 Anánîa chiū khì, ji̍pkhì hit keng chhù, hōaⁿchhiú tī Sólô ê sinchiō͘ⁿ kóng:” Sólô hiaⁿtī, tī lí lâi chia ê lō͘tiong, ǹg lí hiánhiān ê Chú, chiūsī Ia-so͘ , I phài góa lâi hō͘ lí ēthang koh khòaⁿtio̍h, iā pī Sèngsîn chhiongmóa.”

9:18 Sûisî chiū ū ná chhinchhiō͘ⁿ hîlân ê mi̍h, án i ê ba̍kchiu lak lo̍h lâi, i chiū kohchài khòaⁿkìⁿ, chôaⁿ khí lâi niásiū sélé.

9:19 I chia̍h pn̄g liáu, théla̍t mā hoeho̍k. Sólô hām Tāimásek ê bûntô͘ chòhóe tòa kúi ji̍t āu,

9:20 chiū tī kok hōetn̂g soaniông Iaso͘, kóng I sī Siōngchú ê kiáⁿ.

9:21 Thiaⁿtio̍h ê lâng lóng chin ìgōa kóng:” Tī Iâlō͘satléng pekhāi kiûkiò chit ê miâ ê lâng, kam m̄ sī i mah? Koh i lâi lán chia ê bo̍kte̍k, chiūsī beh lia̍h lán khì kau hō͘ Tōachèsi.”

9:22 M̄ku, Sólô lú kóng lú ū la̍t, mā ǹg tòa tī Tāimásek ê Iûthàilâng chèngbêng Iaso͘ chiūsī Mîsàia.

9:23 Kòe liáu chinchē ji̍t, hia ê Iûthàilâng kèōe beh sathāi Sólô,

9:24 m̄ku in ê kèbô͘ hō͘ Sólô chaiiáⁿ. Hia ê beh hāi i ê lâng mêji̍t lóng tī siâⁿmn̂g kháu tangtán beh thâi i.

9:25 Tānsī i ê bûntô͘ tī àmsî hō͘ i chē tī chi̍t kha lángá lāi, án siâⁿchhiô͘ⁿ téng kā i lūi lo̍h khì.

9:26 Tng Sólô kàu Iâlō͘satléng siō͘ⁿ beh kap bûntô͘ kauóng, in lóng kiaⁿ i, m̄ sìn i iā sī bûntô͘.

9:27 Chí ū Panápa chiapthāi i, chhōa i khì kìⁿ sùtô͘, chiong i tī lō͘tiong ánchóaⁿ khòaⁿtio̍h Chú, Chú kā i kóng siáⁿmih ōe, íkip soatbêng Sólô tī Tāimásek hótáⁿ hōng Iaso͘ ê miâ thoântō.

9:28 Tùi chitsî khí, Sólô chiah tī Iâlō͘satléng hām bûntô͘ chòhóe chhutji̍p, hōng Chú ê miâ hótáⁿ thoântō.

9:29 I mā kap kóng Hiliapōe ê Iûthàilâng piànlūn, in soah siō͘ⁿ beh sathāi i.

9:30 Tng chèng hiaⁿtī chai-iáⁿ chiū chhōa i lo̍h khì Kaisatlīa, án hia sáng i tńgkhì Tāisò͘.

9:31 Hitsî, Iûthài, Kalīlī, Satmálīa ê kàuhōe lóng chin úntēng hoattián, ná lâi ná kiankò͘; in hoânsū kèngùi Siōngchú, koh tittio̍h Sèngsîn ê anùi, sìntô͘ jînsò͘ itti̍t chengka.

9:32 Tng Pítek khì kok kàuhōe hóngbūn ê sî, mā ū khì kàu tòa tī Lūtāi ê sìntô͘ hia hóngbūn;

9:33 Tútio̍h chi̍t ê hōchò Inîngá ê, i choânsin bô la̍t tó tī chhn̂gténg íkeng ū pehnî kú.

9:34 Pítek kā i kóng:” Inîngá, Iaso͘ Kitok kā lí ihó à, khí lâi! Chénglí lí ê bînchhn̂g.” I sūi khílâi.

9:35 Só͘ū tòa tī Lūtāi hām Satlûn ū khòaⁿtio̍h i ê lâng, chiū lóng kuiǹg Chú.

9:36 Tī Iokphàⁿ ū chi̍t ê lúsìntô͘ hōchò Tāipítāi, Hiliapōe ê ìsù sī Toka, chiūsī lo̍ká; I put sî chò hósū, chinchè bô chîⁿ ê lâng.

9:37 Hit ê sîchūn, i pēⁿ kah chin siongtiōng soah sí khì, lâng chiū kā i sé chhengkhì, khǹg tī lâuténg.

9:38 Lūtāi kap Iokphàⁿ lî bô lōa hn̄g, bûntô͘ thiaⁿtio̍h Pítek tī hia, chiū kiò nn̄g ê lâng khì chhōe i, khúnkiû i:” Chhiáⁿ kínlâi goán chia, m̄thang iântî.”

9:39 Pítek sūi kap in khì, kàu ui ê sî; ū lâng chhōa i khì lâuténg. Só͘ū ê kóaⁿhū lóng khiā tī Pítek ê sinpiⁿ leh háu, the̍h Toka hām in chòhóe chò ê gōasaⁿ hō͘ i khòaⁿ.

9:40 Pítek chiū kiò in lóng chhutkhì, kūi lo̍h khì kîtó, jiânāu oa̍t kòe khì kā sinsi kóng:” Tāipítāi khí lâi!” I ê ba̍kchiu sūi thíkhui, khòaⁿtio̍h Pí-tek, chiū chē khí lâi.

9:41 Pítek chhunchhiú hû i khiā khí lâi, koh kiò hia ê sìntô͘ hām kóaⁿhū ji̍p lâi, chiū chiong kohoa̍h ê Toka kau hō͘ in.

9:42 Choân Iokphàⁿ ê lâng lóng chaiiáⁿ chit hāng tāichì, chiū ū chinchē lâng lâi sìn chú.

9:43 Chiah ê sū kòe liáu, Pítek tòa tī chòphôe saihū ê chhù chinchē ji̍t.

       2025.08.23. Siukái tī Lâmthâm