Sùtô͘ Hêngtoān Tē gō͘ chio͘ⁿ

5:1 M̄ku ū chi̍t ê miâ chò Anánîa ê, kap i ê bó͘ Sathuilat bē in ê kasán,

5:2 in chiong só͘ tittio̍h ê chîⁿ lâu chi̍t pō͘hūn, chhun ê chiah the̍h khì kau hō͘ sùtô͘.

5:3 Pítek kóng:” Anánîa! Lí sī ánchóaⁿ hō͘ Sattàn chhiongmóa lí ê sim lâi khiphiàn Sèngsîn, kā bē kasán só͘ tit tio̍h ê chîⁿ, lâu chi̍t pō͘hūn khí lâi?

5:4 Chhùtē iáubōe bē chinchêng, kám m̄sī siok tī lí ê? Bē liáuāu lí ū koân thang chhúlí? Lí náē ū chit chióng liāmthâu, lí m̄sī khiphiàn lâng, sī khiphiàn Sèngsîn.”

5:5 Anánîa thiaⁿtio̍h chiah ê ôe, chiū lek lo̍h khì, soah tn̄gkhùi. Thiaⁿtio̍h chit hāng tāichì ê lâng lóng chin kiaⁿhiâⁿ.

5:6 In hia ê siàuliân lâng chiong i pau hósè, kā kng chhut khì tâi.

5:7 Tāiiok kòe saⁿ tiámcheng āu, i ê bó͘ ji̍plâi, iau m̄chai ū hoatseng chit hāng tāichì.

5:8 Pítek tùi i kóng:” Lí kā góa kóng, lín bē chhùtē ê chîⁿ, kam ká nā chiah ê? I ìn:” Sī, áne nātiāⁿ.”

5:9 Pítek kóng:” Lín sī ánchóaⁿ tangsim chhìthàm Chú ê Sèngsîn? Lí khòaⁿ bâichòng lín ang ê lâng íkeng tńglâi kàu mn̂gkháu, mā beh kā lí kng khì tâi.”

5:10 I sūi tī Pítek ê bīnchêng lek lo̍h khì, chiū tn̄gkhùi. Hia ê siàuliân lâng ji̍plâi khòaⁿ i íkeng sí khì, chiū kā i kng chhut khì, tâi tī in ang ê piⁿá.

5:11 Choân kàuhōe hām thiaⁿtio̍h chit hāng tāichì ê lâng, lóng tōa tio̍hkiaⁿ.

5:12 Chú thongkòe sùtô͘ ê chhiú tī bînchiòng ê tiongkan kiâⁿ chin chē sînjiah kîsū; in lóng tângsim ha̍pì tī Só͘lôbûn ê cháulông chūhōe.

5:13 Kîthaⁿ ê lâng, bô chi̍t ê káⁿ óakīn in, m̄ku lóng chin chuntiōng in.

5:14 Kuiǹg chú ê sìntô͘, chengka chinchē, lâmlú lóng ū.

5:15 Sīmchì ū lâng chiong pēⁿlâng, liân chhn̂gpho͘ lóng kā kng lâi khǹg tī lō͘piⁿ, áne Pítek kiâⁿ kòe lâi ê sî, chìchió ētàng hō͘ i ê iáⁿ chiò tio̍h chi̍t kóa lâng.

5:16 Iá ū chi̍t tōa tīn lâng chòehóe tùi Iâlō͘satléng chiuûi ê siâⁿchhī, chhōa pēⁿlâng hām hō͘ kúi hūsin ê lâng lâi, in lóng tit tio̍h ihó.

5:17 M̄ku tōa chèsi hām i ê tângphōaⁿ, chiūsī Satto͘kai lâng lóng lún bē tiâu, chiaⁿ chi̍ttò͘ ,

5:18 chiū kā sùtô͘ lia̍h khí lâi, koaiⁿ loh kaⁿga̍k.

5:19 Chóngsī tī àmmê ê sî, Chú ê súchiá lâi khui kaⁿga̍k ê mn̂g, chhōa in chhut lâi,

koh kautài in:

5:20 “ Lín khì khiā tī sèngtiān, chiong chi̍t ê oa̍hmiā ê chintō kā chènglâng soatbêng.”

5:21 Sútô͘ thiaⁿ liáu chia̍h ê ōe, tī thiⁿ teh beh kng ê sî chiū khì sèngtiān, tiàm hia kàutō bînchiòng. M̄ku tōa chèsi hām i ê tangphōaⁿ lâi kàu ui, sûi chip chê konghōe gīoân, mā tiàu Íseklia̍t chèng chiphài ê siúléng lâi, chiū phài lâng khì kaⁿga̍k kā sùtô͘ chhōa lâi.

5:22 Chóngsī, hia ê siū phài khì ê lâng, khì kàu kaⁿga̍k khòaⁿ bô lâng, sūi tńglâi pòkò:

5:23 “ Goán khòaⁿtio̍h kaⁿga̍k ê mn̂g koaiⁿ kah chin tiâu, kò͘siú ê lâng mā khiā tī mn̂ggōa leh kò͘; mn̂g chi̍t ē khui khiok bô khòaⁿtio̍h pòaⁿ ê lâng.”

5:24 Sèngtiān ê siúōetió͘ⁿ hām chèsitió͘ⁿ thiaⁿ tio̍h chiah ê ōe, kámkak chin kîkoài, mā m̄chai tāichì ē ánchóaⁿ iánpiàn.

5:25 Ū chi̍t ê lâng lâi pòkò:” Lín kā koaiⁿ tī kaⁿga̍k ê lâng, chit má tī sèngtiān lāi khiā teh kàutō bînchiòng.”

5:26 Siúūitió͘ⁿ sûi kap pō͘hā khì chhōa sùtô͘ lâi, in m̄ káⁿ ēng kiônglia̍t ê chhiútōaⁿ, inūi in kiaⁿ bînchiòng theh chio̍hthâu khian in.

5:27 In chhōa sùtô͘ lâi khiā tī gīhōe ê bīnchêng; tōachèsi mn̄g in kóng:

5:28 “ Goán kám bô chin giâmkeh kìmchí lín, bē sái koh hōng chit ê lâng ê miâ lâi kàutō ? Lín tiantó chiong lín ê kàutō thoân kàu Iâlō͘satléng tak só͘chāi, phahsǹg chiong lâu chit ê lâng ê hoeh ê chekjīm kui hō͘ goán.”

5:29 Pítek hām sùtô͘ hôetap:” Goán pitsu sūnthàn Siōngchú, khah iâⁿkòe sūnthàn lâng.

5:30 Lín kā I téng sí tī si̍pjīkè téng ê Iaso͘, lán ê chó͘sian ê Siōngchú íkeng hō͘ I kohoa̍h.

5:31 Siōngchú ēng I ê chiàⁿchhiú koh thêseng I, hō͘ I chò ông, chò Kiùchú, hō͘ Íseklia̍tlâng ū hóekái ê sim, chōekòa tit tio̍h siàbián.

5:32 Goán sī chiah ê tāichì ê kiànchèngjîn, Siōngchú sió͘ⁿsù hō͘ I ê Sèngsîn mā ūi tio̍h chit hāng tāichì chò kiànchèng.”

5:33 Choân gīhōe ê lâng thiaⁿ liáu chin siūkhì, koatì beh thâi in.

5:34 M̄ku ū chi̍t ê lâng tī hōegī tiong khiā khí lâi, i miâ chò Kamália̍t, sī Hoatlīsài phài ê, mā sī chènglâng chuntiōng ê kàusu. I kiò lâng kā sùtô͘ chiāmsî chhōa khì gōabīn,

5:35 chiah tùi chèng gīoân kóng:” Íseklia̍tlâng à, Lín só͘ beh pān ê chiah ê lâng, tio̍h sèjī.

5:36 Íchêng ū chi̍t ê kiò chò Tiutāi ê lâng chhutlâi, chūchheng katī chin béng, tāiiok ū sìpah lâng tòe i. I pī thâi íāu, hia ê thiaⁿ i hōlēng ê lâng mā lóng sìsòaⁿ, náchhiō͘ⁿ bô chit hāng tāichì hoatseng.

5:37 Tī chit ê lâng íāu, koh ū Kalīlī ê Iûtāi tī hō͘kháu tengkì ê sîkî chhuthiān, íniú chi̍t tīn lâng lâi tòe i. I mā bia̍tbông, tòe i ê lâng mā lóng sòaⁿ liáuliáu.

5:38 Hiānchāi, góa kā lín kóng, mài chap chiah ê lâng , chhutchāi in khì! In só͘ kèbô͘, só͘ chò ê, nāsī chhut tī lâng, ittēng ē sitpāi;

5:39 nāsī chhut tī Siōngchú, lín chiū bētàng siaubia̍t in, koh khióngkiaⁿ sī kap Siōngchú chòtùi à.”

5:40 Gīhōe ê chènglâng tôngì i ê kiàngī, chiū kiò Sùtô͘ li̍plâi, ēng piⁿ phah in, koh chi̍tpái bēnglēng in bē sái hōng Iaso͘ ê miâ kángtō, chiah pàng in chhut khì.

5:41 Só͘í Sútô͘ līkhui gīhōe, móasim hílo̍k, inūi in hō͘ lâng khòaⁿchò ē kham tit ūi Chú Iaso͘ ê miâ siū bújio̍k.

5:42 In tak ji̍t puttoān tī sèngtiān, chhùlāi kàutō lâng, soanthoân Iaso͘ sī Kitok.

        2025.08.20. Siukái tī Lâmthâm