Sùtô͘ Hêngtoān Tē saⁿ chio͘ⁿ

3:1 Ū chi̍t ji̍t ê ēpo͘ saⁿtiám, chiūsī tāike kîtó ê sîkan, Pítek kap Iokhān teh beh kiâⁿ chiōⁿ khì beh chin li̍p sèngtiān ê sî.

3:2 Ū chi̍t ê lâng sī tùi chhutsì chiū páiⁿkha, ta̍k ji̍t hō͘ lâng kng lâi chē tī sèngtiān ê mn̂ggōa, hit ê mn̂g hō chò “ Súi mn̂g”, lâi ǹg beh kiâⁿ li̍p sèngtiān ê lâng thó mi̍hkiāⁿ.

3:3 Tng i chi̍t ē khòaⁿtio̍h Pítek kap Iokhān mā teh beh kiâⁿ li̍p sèngtiān, chiū ǹg in kiûthó thang pun tāmpo̍h.

3:4 Pítek hām Iokhān chôaⁿ chùba̍k khòaⁿ i, Pítek kā i kóng: ”Lí khòaⁿ goán !”

3:5 I chiū lia̍h in kimkim siòng, ǹgbāng ē tàng tùi in tit tio̍h siáⁿmih.

3:6 Pítek kóng: ”Kim hām gîn góa lóng bô, tānsī góa beh chiong góa só͘ū ê hō͘ lí, góa hōng Násatle̍k lâng Iaso͘ Kitok ê miâ, hō͘ lí peh khí lâi, koh ē tàng kiâⁿ.”

3:7 Pí-tek chiū khì khan i ê chiàⁿ chhiú, hō͘ i khiā khí lâi; i ê kha hām khaba̍k sûisî ū la̍tthâu,

3:8 thiàu khí lâi khiā leh, mā khaisí kiâⁿlō͘, kap in chòhóe ji̍p khì sèngtiān, ná kiâⁿ ná thiàu iā ná oló Siōngchú.

3:9 Chènglâng khòaⁿtio̍h i teh kiâⁿ, teh gîmsi oló,

3:10 jīn chhut lâi i chiūsī hit ê tiāⁿtiāⁿ chē tī Súimn̂g piⁿ leh ǹg lâng thóchîⁿ ê, chiū ūi tio̍h i só͘ kenggiām tio̍h ê tāichì, kámkak chin sînkî, mā siō͘ⁿ bô tàuté sī ánchóaⁿ.

3:11 Tng hit ê tit tio̍h ihó ê lâng, tī hō chò Só͘lôbûn ê cháulông, iau kā Pítek hām Iokhān tòe tiâutiâu ê sî, chènglâng kámkak chin kîkoài, chiū lóng cháu óa lâi in hia.

3:12 Pítek khòaⁿtio̍h áne, sūi tùi hia ê lâng kóng: ”Íseklia̍t lâng à, lín ūisiáⁿmi̍h kā chit hāng tāichì khòaⁿ chò chin kîkoài? Sī ánchóaⁿ itti̍t leh khòaⁿ goán? Lín kam siō͘ⁿ kóng goán sī khò katī ê khùila̍t á sī kèngkhiân, hō͘ chit ê lâng peh khí lâi kiâⁿ sī bô?

3:13 Apeklahhán、Ísat、Ngákok ê Siōngchú, chiūsī lán chó͘sian ê Siōngchú, íkeng hō͘ I ê po̍kjîn Iaso͘ tit tio̍h êngiāu à, lín hoántńg kā I kau hō͘ Pília̍pto; Pília̍pto koattēng beh sekhòng I, m̄ku lín tong tiô͘ⁿ kūchoa̍t.

3:14 Lín kūchoa̍t hit ūi sèngkiat koh konggī ê, tiantó kiû Pília̍pto páng chi̍t ê satjînhoān hō͘ lín.

3:15 Lín hāi sí oa̍hmiā ê “Thianchú”(天子), Siōng-chú khiok hō͘ I tùi silâng tiong kohoa̍h lah. Goán lóng sī chit hāng tāichì ê kiànchèng jîn.

3:16 Goán inūi sìn I ê miâ, I ê miâ chiū hō͘ chi̍t ê lín só͘ khòaⁿtio̍h só͘ pat ê páiⁿkha è, tit tio̍h ióngchōng; che chiū sī I só͘ sió͘ⁿsù ê sìnsim, hō͘ chit ê lâng tī lín tāike ê bīnchêng oânchoân hoeho̍k.

3:17 Hiaⁿtī à, taⁿ góa chaiiáⁿ lín kap lín ê léngtō chiá áne chò, sī inūi lín m̄ chai,

3:18 m̄ku chia ê tāichì Siōngchú ū chiah tio̍h I ê chèng tāigiân jîn ê chhùi soanpò͘ Kitok ē siūhāi, chit ê tāichì chiū áne ènggiām.

3:19 Só͘í, lín tio̍h hóekái, koh chi̍t pái lâi kuiǹg Siōngchú, thang hō͘ lín ê chōe tit tio̍h boahsiau,

3:20 Ane pêngchēng ê ji̍tchí chiū beh àn SiōngChú ê bînchêng lâi kàu, koh chhephài I só͘ tiāⁿtio̍h ê Kitok lâikàu lín tiongkan.

3:21 Iaso͘ tio̍h lâu tī thiⁿténg, tánhāu bānmi̍h lóng ōaⁿsin ê sî, che sī chiàu Siōngchú àn kó͘chá ílâi chiohtioh chèng sianti ê chhùi só͘ soanpò͘ ê.

3:22 Mô͘se bat kóng: ”Chú , lín ê Siōngchú ē tùi lín hiaⁿtī ê tiongkan, kā lín siatli̍p chi̍t ūi chhinchhiō͘ⁿ góa, sī Siōngchú ê tāigiân jîn áne, I só͘ kā lín kóng ê, lín lóng tio̍h thiaⁿ.

3:23 Nā bô thiaⁿ hit ūi tāigiân jîn ê lâng, ittēng ē túi chúbîn ê tiongkan kā siaubia̍t.」

3:24 koh chū Satbúní ílâi, só͘ū ê sianti ê ūgiân, mā lóng ū kóng khí chiah ê ji̍tchí.

3:25 Lín sī chèng sianti ê kiáⁿsun, iā sêngchiap Siōngchú kap lín ê chó͘sian só͘ li̍p ê iok, chiūsī tùi Apeklahhán só͘ kóng:「Tē chiō͘ⁿ bāncho̍k lóng ē tùi lí ê kiáⁿsun tì tio̍h hokkhì.」

3:26 Siōngchú íkeng siatli̍p I ê po̍kjîn, chiū phài I tāiseng lâikàu lín chia, beh sù hok hō͘ lín, hō͘ lín ta̍k lâng thang oattńg, līkhui chōeok.」

                2025.08.16. Siukái tī Lâmthâm