Sùtô͘ Hêngtoān Te jīcha̍p chhit chio͘ⁿ

27:1 Chhâikoat khaktēng, goán tio̍h chēchûn khì Ítāilī. In chiū kā Pólô kap kîthaⁿ ê hoānlâng, kau hō͘ Òkó͘su iâⁿ ê liântió͘ⁿ, i miâchò Iûliâu.

27:2 Goán tah chi̍tchiah Atāibítiân ê chûn, i ē iântio̍h Asea ê háihōaⁿ kúiā ê kángkháu kiâⁿ, goán chiū chhuthái. Alíta̍tkó͘ sī Mákîtùn ê Thia̍psatlônîka lâng, kap goán siāngkhoán tah chitchiah chûn.

27:3 Kehji̍t goán kàu Setùn, Iûliû tùi Pólô chin iúsiān, únchún i khì chhōe i ê pêngiú, chiapsiū in ê chiapthāi.

27:4 Án hia koh khuichûn, goán inūi chìⁿhong ê goânin, chiū sūn Kupílō͘ ê tó siámhong kengkòe.

27:5 Goán ū kengkòe Kilīka, Pônghuilīa ê háibīn, lâikàu Lūka ê Múilah.

27:6 Tī hia, liântió͘ⁿ tútio̍h chi̍tchiah Ale̍ksantāi ê chûn, beh khí Ítāilī, chiū kiò goán tah hitchiah chûn.

27:7 Chûn kiâⁿ chinbān, kòe chinchē ji̍t chiah kàu Keknîthó͘ ê gōahái. Inūi hō͘ hong chó͘tòng, goán chiū sūn Keklítí ê tó siámhong, kiâⁿ kòe Satmô͘nî.

27:8 Goán iân tio̍h háihōaⁿ, chin bô kántan kiâⁿ lâikàu hōchò Súikáng ê só͘chāi, lī Lahsea siâⁿ bô lōa hn̄g.

27:9 Tī háibīn kòe chinchē ji̍t, kìmchia̍h ê kîkan iā íkeng kòe, koh kiâⁿ ē chin gûihiám, Pólô chiū khǹg tāike,

27:10 kóng:” Kokūi, góa khòaⁿ kiâⁿ chi̍tchōa chûn, m̄niā chiahê hòe ē siūsǹg, chûn māē phòhoāi kah chin siongtiōng, sīmchì liân lán ê sèⁿmiā mā chin gûihiám.

27:11 M̄ku liântió͘ⁿ khah sìnho̍k khuichûn saihū kap chûn thâuke ê kónghoat, bô thiaⁿ Pólô só͘ kóng ê.

27:12 Inūi tī hitê háikáng bô sekha̍p kòe tangthiⁿ, tōapō͘hūn ê lâng lóng kiàngī līkhui hia, kèsio̍k chhuthái ǹgbāng ēthang khìkàu Huinîki kòe tangthiⁿ. Huinîki sī Keklítí ê kángkháu, chi̍tpêng ǹg tangpak, chi̍tpêng ǹg tanglâm.

27:13 Hitsî ū siókhóa khí lâmhong, in siō͘ⁿ kóng ētàng sūnlī kàuui, chiū kā tiàⁿ siu khílâi, iân Keklítí ê háihōaⁿ kiâⁿ.

27:14 Kiâⁿ bô lōakú, án lio̍ktē ê soaⁿthâu thàu tōahong, kiòchò「Iúlahkulûn」sàu lo̍hlâi.

27:15 Chûn soah hō͘ po̍khong khòngchè tiâu leh, bô hoattō͘ kèsio̍k chinchêng, chíhó chhutchāi i khì.

27:16 Chûn lâikàu chi̍tê kiòchò Kotāi ê siótó, tī siámhong ê iânhōaⁿ biánkióng kā sampán siu khílâi.

27:17 Sampán giú khílâi chûnténg liáuāu, chiū ēng tōasoh pa̍k tī chûnté. Koh kiaⁿliáu ē tī Sàinítí ê soachiu khòchhián, chiū kā hongphâng lūi lo̍hlâi, chhutchāi chûn phiauliû.

27:18 Tng goán khì hō͘ po̍khongú sàu kah chin siongtiōng, kehji̍t tāike chiū kā chûnténg só͘ū ê hòe hiatlo̍h hái.

27:19 Tesaⁿji̍t, in koh chhinchhiú kā chûnlāi ê kangkhū tàn loh hái.

27:20 Kúināji̍t bô khòaⁿtio̍h ji̍tthâu kap chheⁿsîn, po̍khongú koh kèsio̍k pek goán, hō͘ goán oânchoân sitkhì pī kiù ê ǹgbāng.

27:21 Chènglâng kúināji̍t bô chia̍h mi̍hkiāⁿ, Pólô lâi khiā tī in tiongkan, kóng:” Kokūi, lín ná ū thiaⁿ góa, bô līkhui Keklítí, chiū bô chiahê sionghāi kap súnsit.

27:22 Taⁿ góa khǹg lín chínchok khílâi, inūi lín tiongkan bô chi̍tê ē sitlo̍h i ê sèⁿmiā, kantaⁿ ē sitkhì chitchiah chûn niāniā.

27:23 Inūi góa só͘siok, só͘ ho̍ksāi ê Siōngchú, I ê thiⁿsài chaàm khiā tī góa sinpiⁿ,

27:24 tùi góa kóng:「Pólô m̄bián kiaⁿ! Lí ittēng ē khiā tī Kaisat ê bīnchêng, khòaⁿ leh, hām lí kāng chûn ê lâng, Siōngchú íkeng úithok lí à.」

27:25 Só͘í, lán tio̍h chínchok khílâi, inūi góa siongsìn Siōngchú ē chiâⁿ I só͘ kóng ê tāichì.

27:26 M̄ku, lán ittēng ē tī chi̍tê tó khòchhián.

27:27 Kàu tē cha̍psì mê ê sî, chûn tī Atía hái phiaulâi se̍hlâi se̍hkhì, kàukah pòaⁿmê, chúichhiú lia̍hchò tehbeh óakīn lio̍ktē,

27:28 in chiū thàm háité ê chhimchhián, ū sìcha̍p bí chhim, koh chìnchêng siókhóa, chhaputto saⁿcha̍p bí,

27:29 in kiaⁿ chûn ē khò tī chio̍hthâu téng, chôaⁿ án chûnbóe tàn sìliap tiàⁿ, ǹgbāng thiⁿ kóaⁿkín kng.

27:30 Tng hiaê chúichhiú siō͘ⁿ beh līkhui chûn tôcháu, chiū pàng sampán loh hái, kéchò beh án chûnthâu phatiàⁿ.

27:31 Pólô tùi iâⁿtió͘ⁿ hām hiaê pengá kóng:” In nābô lâu tiàm chûnténg, lín chiū bô kiù.

27:32 Chiū ahne, pengá khì chámtn̄g sampán ê tōasoh, chhutchāi i khì.

27:33 Kàu thiⁿ beh kng ê sî, Pólô khoànkhǹg tāike chia̍h kóa mi̍hkiāⁿ, kóng:” Kàu kináji̍t íkeng tē cha̍psì ji̍t, lín iáuteh ǹgbāng hām kìmchia̍h, lóng bô chia̍h pòaⁿhāng.

27:34 Só͘í góa khǹg lín chia̍h kóa mi̍hkiāⁿ, che hām lín ê sèⁿmiā iúkoan, inūi lín bôlâng ē sitlo̍h chi̍tki thâumn̂g.

27:35 Pólô kóng liáu, chiū theh piáⁿ khílâi, tī chènglâng ê bīnchêng kámsiā Siōngchú, koh pehkhui lâi chia̍h.

27:36 Tùi ahne in ê sim lóng khui à, mā khaisí chia̍h mi̍hkiāⁿ.

27:37 Choân chûnténg ê lângsò͘, goán chóngkiōng ū nn̄gpah chhitcha̍p la̍k ê.

27:38 Tng in lóng chia̍hpá, chiū kā chhun ê be̍há tàn loh hái, hō͘ chûn bián chái kah hiah tāng.

27:39 Thiⁿkng ê sî, in m̄chai sî tī siáⁿmih só͘chāi, m̄ku khòaⁿtio̍h chit ê háioan ū hōaⁿ thang chiō͘ⁿhōaⁿ, chiū koattēng beh chhì khòaⁿmāi leh, símsī ētàng kā chûn sái óa khì.

27:40 In chiū kā tiāⁿsoh chámtn̄g tàn loh hái, siângsî tháukhui chûntōa ê soh, iā kā chûnthâu ê hongphâng giú khílâi hō͘ i chia̍h hong, hō͘ chûn sūn hongsè khí khòhōaⁿ.

27:41 M̄ku kiaⁿkàu nn̄gtiâu chúilâu siokap ê só͘chāi, kuichiah chûn chôaⁿ khá tī hia, chûnthâu bētinbētang, chûnbóe soah hō͘ tōaéng phah kah khaisí li̍hkhui.

27:42 Pengá ê ìsù beh kā hoānlâng chhúsí, kiaⁿliáu in thau siûcháu.

27:43 M̄ku iâⁿtió͘ⁿ beh kiù Pólô, sūi chó͘tóng in ê phahsǹg, koh hālēng ēhiáu siûchúi ê, seng thiàulo̍h chúi, siû chō͘ⁿhōaⁿ,

27:44 kîthaⁿ ê lâng līiōng pangà, ahsī chûnténg ê kîthaⁿ mi̍hkiāⁿ, tòe in chiō͘ⁿhōaⁿ. Ahne, goán choânpō͘ ê lâng lóng anchoân chiō͘ⁿ kàu lio̍ktē.

       2025.09.18. Siukái tī Lâmthâm