Mákhó Hokimsu Tē Cha̍pit Chio͘ⁿ

11:1 Iaso͘ hām ha̍kseng tehbeh kiâⁿ kàu Iâlō͘satléng ê sî, tī Kannásoaⁿ soaⁿkha ê Pekhoatkî kap Pektāinî hia, kiò nn̄g ê ha̍kseng lâi,

11:2 Kā in kóng: ”Lín khì thâuchêng ê chngsiā, tu kiaⁿkàu ê sî, sûi ē khòaⁿtio̍h chi̍tchiah lûá pa̍k tī hia, sī iáu m̄bat hō͘ lâng khiâkòe ê, lín kā tháukhui khanlâi chia.

11:3 Nā ū lâng mn̄g lín:「Sī ánchóaⁿ beh ahne chò?」Lín chiū ìn:「Chú beh ēng i. I ē koh khan tńglâi chia.」”

11:4 In nn̄gê chiū khì, kójiân khòaⁿtio̍h chi̍tchiah lûá pa̍k tī mn̂ggōa hō͘ lâng khòaⁿhiānhiān, sûi khì kā tháu khui.

11:5 Ū kúiêlâng khiā tī hia mn̄g in kóng: ” Lín sī ánchóaⁿ leh tháu hitchiah lûá? ”

11:6 Ha̍kseng chiàu Iaso͘ só͘ hoanhù ê hôetap, hia ê lâng chiū hō͘ in khan khì.

11:7 In chiong lûá khan lâi Iaso͘ hia, sûi thǹg katī ê saⁿ phoa̍h tī lûá téng, hû Iaso͘ khílih khiâ.

11:8 Ū cho̍kchēlâng khòaⁿtio̍h ahne, chiū ēng katī ê gōasaⁿ pho͘ tī thô͘kha, iā ū lâng khì hn̂gá chhó chhiūki lâi pho͘ .

11:9 Chi̍t tōatīn lâng tòechêng tòeāu, nakiâⁿ nahoah ”Hôsatná, hōng Chú ê miâ lâi ê engkai siū chènglâng ê oló!

11:10 Lán ê chó͘ Tāipi̍t ê kok tehbeh lâi à, sī engkai siū oló ê! Tī siōngkoân ê só͘chāi mā hoah hôsatná. “

11:11 Iaso͘ lâi kàu Iâlō͘satléng, kiâⁿ ji̍pkhì sèngtiān, chi̍tsìkè khòaⁿ hiaê ta̍khāng mi̍hkiāⁿ. Thiⁿ iā íkeng àm à, I chiū hām cha̍pjī ê ha̍kseng līkhui hitê siâⁿ, khì Pektāinî.

11:12 Keh ji̍t, in tùi Pektāinî chhutlâi, Iaso͘ paktó͘ leh iau.

11:13 In tùi hn̄ghn̄g khòaⁿtio̍h chi̍tchâng chinchē hio̍há ê bûhoakó chhiū, chiū óakhì chhōe khòaⁿ ū siáⁿmih thang chia̍h bô, tī hia chhōe chi̍tpo͘ kanna ū hio̍há , bô khòaⁿ pòaⁿhāng thang chia̍hê, inūi bûhoakó siusêng ê sî iáubōe kàu.

11:14 Iaso͘ chiū tùi hitchâng chhiū kóng: ” Tùi hiānchāi khaisí, íāu éngoán bôlâng beh chia̍h lí ê kóechí. ” I ê ha̍kseng mā lóng ū thiaⁿkìⁿ chitkù ōe.

11:15 In lâikàu Iâlō͘satléng. Iaso͘ ji̍pkhì sèngtiān, chiong tī hia leh chò senglí ê lâng kóaⁿ chhut khì, iā chiong leh ōaⁿchîⁿ ê tohá hām bē húnchiáuá ê lâng ê íà lóng péng hō͘ tó,

11:16 iā m̄chún lâng theh mi̍hkiāⁿ tùi sèngtiānlāi kiâⁿchhut kiâⁿji̍p,

11:17 tī hia tùi chènglâng kóngkhí Siōngchú ê ōe, ” Kengchheh kám m̄sī ū kìchài, Góa ê chhù sī kiòchò bānkok chènglâng kîtó ê tiān mā? Lín soah tiantó hō͘ i pìⁿchò chha̍tsiū. ”

11:18 Chèsitióⁿ kap kàusu thiaⁿtio̍h chiaê ōe, chiū khaisí siō͘ⁿ beh ánchóaⁿ hāisí Iaso͘ ê pānhoat, m̄ku in kiaⁿ Iaso͘, inūi chènglâng tùi I ê kàutō lóng kámkak chin sinsián.

11:19 Hit àm Iaso͘ kap ha̍kseng tùi siâⁿ līkhui.

11:20 Kèji̍t chákhí in beh koh ji̍p siâⁿ, khòaⁿtio̍h hit châng bûhoakó chhiū, liân kin lóng ta khì.

11:21 Pítek sio͘ⁿ khí Iaso͘ chahng só͘ kóng ê ōe, chiū tùi I kóng: ” Lāusu, chhiáⁿ khòaⁿ! Lí só͘ chiùchò͘ ê bûhoakó chhiū íkeng takhì à! ”

11:22 Iaso͘ ìn kóng: ” Lín tio̍h sìn Siōngchú.

11:23 Góa chin si̍tchāi kā lín kóng: ” Bôlūn siáⁿmih lâng tùi chi̍tchō soaⁿ kóng:「Lí tùi chia sóakhui, thiām lo̍h háinih!」i ê sim nā bô hoâigî, jîchhiáⁿ khaksìn i só͘ kóng ê ittēng ê si̍thiān, chiū ē si̍t-hiān.

11:24 Só͘í Góa kā lín kóng, hoânnā lín tī kîtó tiong só͘ kiû ê, bôlūn sī siáⁿmih, tio̍h sìn íkeng tittio̍h à, chiū tekkhak tittio̍h.

11:25 Lín khiā leh kîtó ê sî, nā sio͘ⁿkhí ū lâng tekchōe lín, chiū tio̍h siàbián i, ahne lín tī thiⁿténg ê Pē mā ē siàbián lín ê kòesit.

11:26 Lín nā m̄ goānì siàbián lâng, lín tī thiⁿténg ê Pē iā bē siàbián lín ê kòesit.

11:27 In koh kiâⁿ ji̍pkhì Iâlō͘satléng. Iaso͘ tī sèngtiānlāi leh kiâⁿ ê sî, chèsitio͘ⁿ kap kàusu kiâⁿ lâi I ê bīnchêng,

11:28 mn̄g I kóng: ” Lí sī khò siáⁿmih koânpèng chò chiaê tāichì, ásī siáⁿmih lâng hō͘ lí ū chitê koân leh? ”

11:29 Iaso͘ ìn in kóng: ” Chinhó, lín nā seng hôetap Góa ê būntê, Góa chiah kā lín kóng, Góa sī chiàtio̍h siáⁿmih koânpèng chò chiaê tāichì.

11:30 Chhiáⁿ mn̄g, Iokhān kiâⁿ sélé chithāngsū sī tùi thiⁿnih, ásī tùi sèkan lâi ē? ”

11:31 In hō͘siong chhamsiông ahne kóng: ” Lán nā kóng「Sī tùi thiⁿni̍h」, I ittēng kóng「Áne, Lín ūisiáⁿmi̍h m̄khéng sìn i?」

11:32 Nāchún kóng「Sī an sèkan lâi è」, koh kiaⁿ kûnchiòng ē putho̍k, inūi chènglâng lóng jīnûi Iok-hān sī sianti. ”

11:33 Tùi áne chiū ìn Iaso͘ kóng: ” Goán m̄chai.” Iaso͘ kóng:” Góa mā bôbeh kā lín kóng Góa sī hōng siáⁿmih lâng ê koânpèng chò chiaê tāichì. ”

    2025.11.03  Siukái tī Lâmthâm